Аляксандру Лукашэнку варта добраахвотна сыходзіць са сваёй пасады. Такую заяву зрабіў французскі прэзідэнт Эманюэль Макрон у інтэрвʼю газеце Le Journal du Dimanche.
Паводле Макрона, у Беларусі зараз працягваецца крызіс аўтарытарнай улады, якая не здольная зразумець логіку дэмакратыі. «Відавочна, што Лукашэнка павінен сысці», – заявіў прэзідэнт Францыі.
Макрон выказаў захапленне беларускімі дэманстрантамі, якія кожныя выхадныя выходзяць на акцыі пратэсту. «Асаблівую павагу выклікаюць жанчыны, якія праводзяць шэсце кожную суботу», – адзначыў ён.
Паводле праваабарончага цэнтру «Вясна» 26 верасня на жаночым маршы ў Менску затрымалі не менш за 120 чалавек, частку з іх увечары адвезлі ў ізалятар на вуліцы Акрэсціна.
АА belsat.eu