Прэс-служба кіраўніка дзяржавы паведамляе, што 20 снежня адбудзецца працоўны візіт Аляксандра Лукашэнкі ў Расейскую Федэрацыю, падчас якога ў тым ліку будуць працягнутыя двухбаковыя перамовы з Уладзімірам Пуціным.
У Санкт-Пецярбургу Лукашэнка прыме ўдзел у пасяджэнні Найвышэйшага Еўразійскага эканамічнага савету, якое пройдзе ў вузкім і пашыраным складах. У парадак дня пасяджэння ўключаны пытанні, якія тычацца стратэгічных напрамкаў развіцця еўразійскай эканамічнай інтэграцыі, прызначэння старшыні і персанальнага складу Калегіі Еўразійскай эканамічнай камісіі ды інш.
Лукашэнка таксама прыме ўдзел у нефармальным саміце кіраўнікоў дзяржаў СНД.
«Традыцыйна на пляцоўках самітаў чакаюцца сустрэчы прэзідэнта Беларусі Аляксандра Лукашэнкі з замежнымі калегамі па тэматыцы двухбаковай супрацы. У прыватнасці, плануецца працягнуць перамовы з прэзідэнтам Расеі Уладзімірам Пуціным на прадмет вырашэння пытанняў у сферы беларуска-расейскіх стасункаў», – адзначае прэс-служба Лукашэнкі.
Нагадаем, у мінулы раз Пуцін і Лукашэнка сустракаліся 7 снежня ў Сочы. Чакалася, што на наступны дзень, 8 снежня, у Маскве на паседжанні Найвышэйшага дзяржаўнага савету Саюзнай дзяржавы адбудзецца падпісанне новай інтэграцыйнай праграмы. Перамовы ў Сочы цягнуліся 5,5 гадзінаў і дамовіцца наконт інтэграцыі кіраўнікі дзяржаваў не змаглі. Лукашэнка ўляцеў у Менск, паседжанне ў Маскве не адбылося.
Па выніках перамоваў у Сочы кіраўнік Мінэканамразвіцця РФ Максім Арэшкін заявіў журналістам, што бакі ўсё ж дасягнулі «сурʼёзнага прагрэсу» падчас перамоваў і праца над «дарожнымі мапамі» будзе працягнутая. Тады ж была анансаваная сустрэча Пуціна і Лукашэнкі 20 снежня.
ІІ belsat.eu