Кіраўнік урада Сербіі Аляксандр Вучыч абвесціў у панядзелак аб адстаўцы кіраўніка міністэрства абароны Браціслава Гашыча, паведамляе Associated Press. Чыноўніка звольнілі за сексізм і непаважлівае стаўленне да журналісткі.
«Мы павінны абараніць жанчын у Сербіі. Гэта быў дрэнны сігнал для ўсіх жанчын. Ніводны міністр не павінен сабе такога дазваляць», – сказаў Вучыч журналістам.
48-гадовы экс-бізнэсмэн, які лічыцца адным з самых блізкіх паплечнікаў сербскага прэмʼера, выбачыўся і сказаў, што яму шкада, аднак паводле Вучыча выбачэнняў і раскаяння міністра недастаткова.
Падставай для адстаўкі стаў інцыдэнт з удзелам тэлежурналісткі з канала В92, якая прысела перад Гашычам, каб не загароджваць камеры аператарам. Міністр тады сказаў: «Да чаго люблю жанчын, якія так лёгка падаюць на калені».
Апазіцыя ўжо неаднаразова патрабавала адправіць яго ў адстаўку, знаходзячы іншыя падставы, але раней кіраўнік Кабміну адмаўляўся яго звальняць.
ДР, belsat.eu