Праваабарончыя арганізацыі Беларусі выступілі з супольнай заявай, у якой прызнаюць Яна Салановіча палітвязнем і патрабуюць яго вызвалення, паведамляе сайт цэнтру «Вясна».
Ян Салановіч студэнт 4-га курса дзённага аддзялення БДУІР. Першага лістапада сёлета яго затрымалі і ў РУУС Партызанскага раёна аказвалі ціск, у выніку чаго ён прызнаўся ў 15 эпізодах удзелу ў мірных сходах за жнівень, верасень і кастрычнік 2020 года.
У выніку хлопца судзілі шэсць разоў (02.11, 05.11, 10.11, 18.11, 22.11, 27.11) і прысудзілі 86 дзён адміністрацыйнага арышту, 27 з якіх ён знаходзіцца ў ЦІП.
Праваабаронцы адзначаюць, што прысуд адразу паводле некалькіх адміністрацыйных арыштаў запар беларускія ўлады і раней выкарыстоўвалі ў мэтах палітычна матываванага ціску. Гэтак Паўла Севярынца асудзілі на 90 дзён запар адміністрацыйнага арышту, пасля чаго завялі крымінальную справу.
«Заключэнне Яна Салановіча выкарыстана выключна ў сувязі з рэалізацыяй ім свабоды мірных сходаў, выказвання меркаванняў і распаўсюду інфармацыі, гарантаваных як Канстытуцыяй Рэспублікі Беларусь, гэтак і міжнароднымі нормамі ў галіне правоў чалавека – Міжнародным пактам аб грамадзянскіх і палітычных правах, у прыватнасці», – заяўляюць праваабаронцы і патрабуюць вызвалення Яна Салановіча.
На дадзены момант у Беларусі 145 чалавек прызнаныя палітзняволенымі.
СК belsat.eu
Напішы журналісту ліст
Тры беларускія журналісткі ўтрымліваюцца цяпер за кратамі і маюць абвінавачванні паводле крымінальных артыкулаў: Кацярына Андрэева(«Белсат»), Дарʼя Чульцова («Белсат»), Кацярына Барысевіч (TUT.BY).
Адным з моцных спосабаў падтрымаць дзеўчын можа стаць ваш ліст да іх.
Куды пісаць:
Кацярына Андрэева (Бахвалава): 222160 г. Жодзіна, вул. Савецкая, д. 22а.
Дарʼя Чульцова: 222160 г. Жодзіна, вул. Савецкая, д. 22а.
Кацярына Барысевіч: СІЗА № 1, 220030 г. Менск, вул. Валадарскага, д. 2.
Не забудзьцеся ўкласці ў ліст пусты канверт, каб дзеўчыны маглі вам адказаць. Дзякуем за вашую неабыякавасць!
