Спроба працаўніка бабруйскага прадпрыемства звольніцца і паехаць на працу ў іншую краіну прывяла да пераследу з боку наймальніка.
Электрык ААТ «Белшына» Сяргей Кудрашоў дамовіўся пра прыём на працу ў Латвіі і атрымаў неабходную візу. Пасля гэтага ён паспрабаваў звольніцца паводле пагаднення бакоў. Зрабіць гэта не атрымалася, але работнік вырашыў у любым разе ехаць за мяжу, хоць нявыхад на старое месца працы пагражаў звальненнем за прагул.
Але замест звальнення яму 25 верасня пачаў пісаць вядучы энергетык прадпрыемства Віталь Болбас, які пагражаў заявай у міліцыю і заяўляў, што Кудрашову могуць абмежаваць выезд за мяжу. Пасля гэтага бацьку працаўніка пачалі тэлефанаваць і патрабаваць з’явіцца на прадпрыемства, каб патлумачыць, дзе знаходзіцца ягоны сын.
«Пайшлі вы ў лес па грыбы!»
У каментары belsat.eu юрыст прафсаюзу РЭП Леанід Судаленка заявіў, што вядучы энергетык «Белшыны» займаецца «самадурствам», бо ў яго няма на такія дзеянні паўнамоцтваў. Віну ж у гэтай сітуацыі спецыяліст ускладае на кантрактную сістэму, якая пануе ў Беларусі.
«Калі б у яго [Сяргея Кудрашова. – belsat.eu] не было кантракту, ён бы за месяц паведаміў наймальніку пра сваё жаданне звольніцца на ўласнае жаданне – і ўсё. А тут, напэўна, ёсць кантракт. Гэта заганная сістэма ў нашай краіне, калі з чалавекам заключаецца кантракт на максімальны тэрмін, і ён не мае права звольніцца, нават калі знайшоў сабе больш прывабную працу з больш высокім памерам аплаты», – адзначыў юрыст.
Леанід Судаленка падкрэсліў, што прафсаюз РЭП будзе абараняць працаўніка і пра патрэбе звяртацца ў праваахоўныя органы.
Юрыст таксама нагадаў, што бацькі адказваюць за сваіх дзяцей толькі да іх 18-годдзя.
«Прычым тут бацькі? Павінны цвёрда сказаць гэтаму чалавеку, які іх будзе турбаваць: «Пайшлі вы ў лес па грыбы!» І будуць правыя», – заявіў Леанід Судаленка.
У выпадку ж наяўнасці ў наймальніка нейкіх матэрыяльных прэтэнзіяў да працаўніка, закон дазваляе вырашыць гэтыя пытанні цягам года праз суд, а «не дзейнічаць такім чынам».
Юрыст адзначыў, што ў Беларусі існуе шмат выпадкаў, калі людзі вымушаныя звальняцца праз прагул. На ягоную думку, калі ў краіне не будуць ствараць новыя працоўныя месцы з добрай аплатай, эканамічную міграцыю за мяжу ўжо будзе не спыніць.
Каб звольніць, трэба тлумачэнне
Між тым вядучы энергетык Віталь Болбас у каментары belsat.eu абверг заявы пра перашкоды звольніцца. Паводле яго, Сяргей Кудрашоў пасля адпачынку проста не выйшаў на працу.
«Каб яго звольніць, нават за прагул, нам трэба нейкае яго тлумачэнне. Адкуль я ведаю, ці ён працуе, ці не працуе. Ён жа можа быць на тэрыторыі рэспублікі. Я ж не магу так меркаваць. Ён, можа, прыедзе з той самай Прыбалтыкі і скажа, што быў на аздараўленні», – расказаў суразмоўца.
Віталь Болбас таксама паведаміў, што ў такім выпадку абавязаны законам зрабіць запыт у міліцыю і наведаць працаўніка ўдома.
«Калі б была ягоная тлумачальная, яго б звольнілі, і ніякіх бы праблемаў не было», – расказаў непасрэдны начальнік Сяргея Кудрашова.
30 верасня быў падрыхтаваны афіцыйны зварот у УУС, каб атрымаць афіцыйныя звесткі, ці сапраўды выехаў Сяргей Кудрашоў за мяжу. Размаўляць з былым падначаленым Віталь Болбас пасля публікацыяў у медыя больш не хоча.
Што датычыць тэлефанаванняў бацькам, то, паводле суразмоўцы, тэлефанавалі толькі бацьку Сяргея Кудрашова, які на заводзе працуе зваршчыкам і ў той дзень быў на выходным. Яго прасілі даць тлумачэнне, каб у прадпрыемства былі нейкія падставы для далейшых дзеянняў, адзначыў вядучы энергетык.
МГ belsat.eu
