Пракуратура патрабуе для былой прэзідэнткі Паўднёвай Карэі 30 гадоў турмы за карупцыю


Пак Кын Кхе. Фота Reuters

Пак Кын Хе ўжо амаль год застаецца пад вартаю.

Дзяржабвінавачанне таксама папрасіла для яе штраф у памеры каля $ 110,4 млн. Чакаецца, што суд вынесе рашэнне ў канцы сакавіка альбо напачатку красавіка.

Пак Кын Хе абвінавацілі ў 18 эпізодах карупцыі, у тым у змове з кіраўніком Lotte Group Сін Дон Біном, злоўжыванні ўладаю, незаконным ціску на буйныя кампаніі, хабары, разгалашэнні дзяржаўных таямніц.

Следства лічыць, што былая прэзідэнтка ўступіла ў змову са сваёй сяброўкай і дачкой лідара рэлігійнага культу «Царква вечнага жыцця» Чхвэ Сун Сіль, каб вымагаць у буйных кампаніяў грошы. Прэзідэнтка таксама дазволіла сяброўцы ўплываць на палітычныя рашэнні нягледзячы на тое, што тая не займала дзяржаўных пасадаў. Яе арыштавалі па падазрэнні ў вымагальніцтве і прысудзілі да 20 гадоў турмы.

У сакавіку 2017 года Пак Кын Хе абвясцілі імпічмент, пасля чаго ў Паўднёвай Карэі прайшлі пазачарговыя выбары. Праз карупцыйны скандал у краіне адбыліся масавыя пратэсты.

ДР belsat.eu

Глядзі таксама
Каментары