Беларускія праваахоўныя органы не ўжывалі захады працэсуальнага прымусу да грамадзянкі Расеі Ганны Багачовай. Пра гэта паведаміў 16 кастрычніка намеснік генеральнага пракурора Аляксей Стук, перадае БелТА.
«Яна [Багачова. – Рэд. Belsat.eu] заставалася на волі», – заявіў Стук.
Паводле яго, інфармацыя пра затрыманне стала вынікам таго, што прадстаўнікі медыяў не ведаюць тонкасцяў і значэння праваахоўных фармулёвак, а «прэс-сакратары не зусім даходліва данеслі гэтую інфармацыю».
Пра затрыманне першымі паведамілі расейскія СМІ, затым гэтыя звесткі пацвердзілі і ў МУС Беларусі. Ганне Багачовай 31 год. Раней яна была актывісткай расейскіх нацыяналістычных арганізацыяў. Прынамсі з 2014 года працавала на расейскую «фабрыку троляў». У 2018 годзе Багачова ўвайшла ў спіс з 13 грамадзянаў Расеі, якім высунулі абвінавачанні ва ўмяшальніцтве ў амерыканскія выбары.
МГ belsat.eu
