Галоўны трэнер нацыянальнай зборнай Беларусі па хакеі Міхаіл Захараў распавёў, у якіх умовах вымушаныя трэнавацца спартоўцы.
Нацыянальная зборная Беларусі па хакеі з шайбаю другі раз запар узяла ўдзел у «Кубку Славаччыны» пад назваю «Каўфлянд Кап – 2020» («Kaufland Cup 2020»), што сёлета прайшоў у славацкім Попрадзе. Як і летась, нашая дружына абедзве сустрэчы прагуляла. Мы былі слабейшыя за Славаччыну 3:4, а алімпійскай зборнай Расеі не закінулі ўвогуле – параза 0:1.
– Зборная Беларусі сутыкнулася з непрадбачанымі цяжкасцямі яшчэ на стадыі рыхтавання да славацкага выезду.
– Я вельмі ўдзячны хакеістам, што, нягледзячы на такое абразлівае стаўленне да каманды, яны працягваюць прыязджаць у нашую нацыянальную зборную і ўжо цяпер усе да аднаго пагадзіліся дапамагчы ёй на чэмпіянаце свету – 2020 у Швейцарыі, – распавёў па прылёце ў Менск галоўны трэнер нацыянальнай зборнай Беларусі па хакеі Міхаіл Захараў. – Але нельга не заўважыць, што стаўленне да нас становіцца ўсё больш зневажальнае. Няма ўмоваў для заняткаў ні на «Менск-Арэне», ні на «Чыжоўка-Арэне». Праблемы з лёдам, з распранальнямі, з асвятленнем.
Летась каманда лятала на гэты ж турнір чартарам, а цяпер у апошні момант Міністэрства спорту і турызму ў асобе міністра паставілі перад фактам, што нас чакаюць рэгулярныя авіярэйсы, а гэта, апроч дзвюх перасадак у аэрапортах, яшчэ і немалы аўтобусны шлях. Вось і выйшла, што ў недалёкую Славаччыну мы дабіраліся 17 гадзінаў, а назад удалося даць рады за 13. Але ўсё роўна з раннім пад’ёмам ужо а шостай гадзіне. Ёсць такія добразычліўцы, якія так зрабілі. Пакуль прозвішчаў не хачу называць, але хутка назаву. Не перажывайце.
Зараз нас чакаюць чатыры красавіцкія матчы «Еўрачэленджу» з Латвіяй ды Казахстанам на «Чыжоўка-Арэне». Дзякуючы старшыні Менгарвыканкаму, той збор павінен адбыцца ў больш прыстойных умовах. Нам дзве распранальні далі, якія мы аб’яднаем. Ну ўжо хоць нешта больш-менш. Ужо колькі год існуе нацыянальная зборная, а ў нас дасюль свайго дому няма. Гэта няправільна.
– Але ж ёсць яшчэ і Федэрацыя хакею Рэспублікі Беларусь…
– Федэрацыя робіць усё магчымае на сённяшні дзень. Хоць там таксама ўсё запушчанае. Мы шмат размаўляем, але для мяне вельмі дзіўна, што ў нашай адміністрацыі, у персаналу зборнай увогуле нічога няма: ні станкоў тачыльных, ну нічога. Мы калі ў верасні размаўлялі, нам прапанавалі пакласці на стол ліст з патрабаваннямі, што трэба для каманды. Мы напісалі каля 45-ці найменняў. Нам адказалі: штосьці ў «Юнацтва» возьмем, штосьці ў «Дынама». Я здзівіўся, што на складзе нічога няма і мы карыстаемся ўжо былым ва ўжыванні. Хоць у свой час і грошы былі пры ранейшым старшыні федэрацыі хакею Ігары Рачкоўскім, і вялікія былі грошы. Няўжо цяжка было для нацыянальнай зборнай штосьці закупіць? Нічога не было. Нават звычайнага фотаапарата. Але пакрысе штосьці знайшлі.
Мы хіба ці не найменш забяспечаныя сярод усіх удзельнікаў чэмпіянату свету – 2020. Зразумела, што маем страхоўку ад вылету ў ніжэйшы дывізіён, бо прымаем планетарнае першынство наступнага года. Але ж зразумела, што сёлета ў Швейцарыі для нас таксама непрыстойна будзе заняць апошняе месца. Таму, лічу, нават ва ўмовах жорсткага ашчаджэння нам павінныя стварыць больш годныя ўмовы пры рыхтаванні да галоўнага старту гэтага сезону, – кажа Міхаіл Захараў
Аляксандр Пуціла Belsat.eu