Праамерыканскія паўстанцы захапілі «сталіцу Ісламскай дзяржавы». Канчатковы падзел Сірыі?
Шматэтнічныя і шматрэлігійныя атрады сірыйцаў пры падтрымцы ЗША цалкам вызвалілі ад тэрарыстычнай «Ісламскай дзяржавы» калішні галоўны яе аплот у Сірыі – горад Раку. Баі скончыліся, аднак Сірыйскія Дэмакратычныя Сілы яшчэ займаюцца ачышчэннем кварталаў ад мін і асобных баевікоў, якія маглі застацца ў горадзе.
Змагары супраць «ІД» скінулі на зямлю чорныя сцягі «Ісламскай дзяржавы», апошні з якіх вісеў на будынку шпіталя каля гарадскога стадыёну.
СДС – шматэтнічны і мультырэлігійны кангламерат палітычна-вайсковых фармаванняў, якія змагаюцца адначасова супраць сірыйскага дыктатара Башара Асада і ісламістаў. Асноўную ролю ў СДС граюць курды, аднак прысутнічаюць таксама мусульмане іншых этнасаў (арабы, туркмены, чэркесы, чачэнцы) і хрысціяне (армяне і асірыйцы). Усе яны абвесцілі сваёй мэтай пабудову секулярнай дэмакратычнай Сірыі з федэратыўным дзяржаўным ладам.
Такім чынам фактычна будзе замацаваны падзел Сірыі як мінімум на тры зоны ўплыву – амерыканскую (курды і іхныя хаўруснікі), турэцкую (пераважна тэрыторыі мусульман-сунітаў на поўначы Сірыі), і расейскую (тэрыторыя пад кантролем Башара Асада).
Сірыйская «сталіца халіфата»
Сёння байцы СДС узялі пад кантроль гарадскі стадыён – апошнюю кропку, дзе ісламісты працягвалі супраціў, піша Reuters. Аднак афіцыйна пра вызваленне гораду будзе абвешчана пазней – калі ён будзе цалкам правераны на наяўнасць мін і «спячых» ячэек «ІД».
Рака стала адным з першых буйных гарадоў, дзе ісламісты ў 2014 годзе захапілі ўладу, і стала неафіцыйнай сталіцай «халіфата». Парады баевікоў, якія праводзіліся тут, былі сімвалам іхнай ваеннай удачы, моцы і фанатызму. Публічныя жорсткія казні, выстаўленыя на сонцы адрубленыя галовы ахвяр джыхадзістаў мусілі запалохваць праціўнікаў і прымушаць іншадумцаў да пакорнасці.
Тэрарысты пачалі ўмацоўваць Раку і яе ваколіцы бункерамі і падземнымі тунэлямі яшчэ ў 2015 годзе, не выключаючы доўгай аблогі гораду і плануючы знясіліць праціўніка ў цяжкіх гарадскіх баях.
У 2016-2017 гадах гэта ў іх амаль атрымалася ў Масуле – баі за іракскі горад працягваліся больш за 9 месяцаў і сталі сапраўдным крывавым выпрабаваннем для новых фармаванняў іракскай арміі, якая была амаль разбеглася ў 2014 годзе.
Баі за Раку пачаліся 6 чэрвеня – у гэты час горад застаўся практычна адзіным вялікім сірыйскім горадам пад кантролем «ІД». Зараз ісламісты фактычна кантралююць толькі частку тэрыторыі каля Еўфрату і пустэльню вакол.
Аднак, у СДС атрымалася ваяваць лепш, чым у іракцаў – яны справіліся ўзяць штурмам вялікі горад прыкладна ў два разы хутчэй, за 4 месяцы.
