Пра Ціханоўскага, кампрамат Лукашэнкі і беларускую мову. Валер Цапкала правёў пікет у Бабруйску

Да бабруйцаў былы кіраўнік Парку высокіх тэхналогіяў прыехаў разам з жонкаю Веранікай, якая апошнім часам паўсюль яго суправаджае. Цягам гадзіны прэтэндэнт на прэзідэнцтва адказваў на пытанні, а потым Цапкалы пайшлі на бабруйскі рынак выбіраць гуркі і памідоры.

Пра Расею: гэта будзе наш пастаянны стратэгічна важны партнёр, вайсковыя базы застануцца

На ўласны пікет для збору подпісаў у Бабруйску Цапкала прыехаў у апошнюю нядзелю траўня. Месца было выбрана адно з самых людных у горадзе – каля цэнтральнага рынку. Але хоць гэта быў і выходны дзень, і дождж толькі часам крыху імжэў, людзей сабралася непараўнальна менш, чым на дзень раней на пікеце Святланы Ціханоўскай. Агулам Валера Цапкалу слухалі каля 50 чалавек.

«Не пужае дождж, пужае Лукашэнка». Прайшоў першы пікет Святланы Ціханоўскай у Бабруйску

Павітаўшыся з выбарцамі, Цапкала сказаў, што вельмі хоча з дарогі пайсці з жонкай на рынак набыць гародніну. Але людзі адразу пачалі задаваць пытанні. Бабруйцаў цікавілі адносіны з Расеяй, што стане з бабруйскімі прадпрыемствамі, адукацыяй, медыцынай, якія будуць пенсіі, калі Цапкала стане прэзідэнтам.

Валер і Вераніка Цапкалы на пікеце ў Бабруйску. Фота: «Белсат»

«Як дыпламат, я буду наладжваць адносіны з Расеяй, – адказваў Цапкала на пытанне пра саюз з усходняй суседкай. – Адначасова трэба і з Еўразвязам наладзіць, і з Амерыкай таксама. Не павінна быць так, каб у нас было тры сябры: Іран, Венесуэла і нейкая там афрыканская Нігерыя. Але ад Расеі мы нікуды не сыдзем. Гэта будзе наш пастаянны стратэгічна важны партнёр. У нас жа нават мова агульная. Так, у нас ёсць беларуская мова, але я ўжо казаў, што Беларусь у развіццё расейскай мовы ўнесла больш, чым Маскоўскае княства. Гэта ж наш Скарына пераклаў Біблію на рускую мову, а потым Сімяон Полацкі стварыў рускую граматыку. Таму з Расеяй у культурным плане мы заўсёды будзем разам. Але з усімі трэба сябраваць і знаходзіць агульную мову. Таму што гэта інвестыцыі, гэта грошы, новыя тэхналогіі».

Валер Цапкала на пікеце ў Бабруйску. Фота: «Белсат»

Валер Цапкала лічыць, што Саюзную дзяржаву ў тым выглядзе, у якім яна ёсць сёння, трэба перагледзець, але некаторыя добрыя бакі пакінуць.

«Новая дамова паміж Расеяй і Беларуссю павінна адпавядаць рэаліям 21-га стагоддзя, а не канца 20-га, калі яна была заключаная. Шмат якія моманты ў саюзнай дзяржаве – добрыя. Гэта магчымасць для беларусаў і расейцаў свабодна паступаць у ВНУ, атрымліваць медычную дапамогу, ездзіць без візаў, уладкоўвацца на працу без атрымання дазволаў. Шмат добрых рэчаў, якія даюць нам магчымасць адчуваць сябе як дома ў Расеі, а расейцам – у нас. Але ёсць рэчы, якія трэба перагледзець».

Сустрэча з Валерам Цапкалам у Менску. ВІДЭА

«А як вы ставіцеся да расейскіх вайсковых базаў на нашай тэрыторыі?» – прагучала адно з пытанняў.

«Я не бачу ў іх сур’ёзнай праблемы для беларускага суверэнітэту, – адказваў Цапкала. – Калі яны сапраўды важныя для Расеі, я лічу, што яны могуць працягнуць сваю працу тут. Калі яны ніяк не ўмешваюцца ў беларускае палітычнае і эканамічнае жыццё і пры гэтым патрэбныя расейцам, то я лічу, яны павінны працягнуць сваё існаванне».

Пенсіі – па 500 долараў, паліклінікі ператворацца ў бізнес-структуры

На пытанне пра будучыню беларускай адукацыі Валер Цапкала адказваў, што сярэдняя школа застанецца бясплатнай, а вышэйшая – як у большасці краін, будзе залежыць ад здольнасці вучняў. Калі чалавек добра вучыцца, ён атрымае падтрымку дзяржавы і фондаў, калі горш – будзе сам плаціць за адукацыю.

«Агульная сярэдняя адукацыя – гэта абавязак дзяржавы, таму яна бясплатная, – сказаў былы кіраўнік Парку высокіх тэхнілогіяў. – Вышэйшая – гэта ўжо права чалавека. У школу дзяржава павінна ўкладвацца, плаціць добрыя заробкі настаўнікам, мадэрнізаваць школы, рабіць камп’ютарныя класы».

«Наконт медыцыны. Я быў кансультантам ураду Грузіі. Для мяне тое, што яны зрабілі, – ідэал, – распавядаў Цапкала. – За дзяржавай яны пакінулі лякарні хуткай дапамогі і спецыялізаваныя цэнтры кшталту анкалагічнага, туберкулёзнага і да т. п. Паліклінікі агульнага профілю аддалі замежнаму інвестару. У выніку за чатыры гады былі пабудаваныя 200 новых паліклінік у раённых цэнтрах і сельскай мясцовасці. Цалкам мадэрнізавалі гарадскія паліклінікі – яны ператварыліся ў бізнес-структуры, якія змагаюцца за дактароў, даюць ім добрыя заробкі. А пацыент можа выбраць сабе доктара і паліклініку, карыстаючыся страхоўкай. Для лекаў трэба адмяніць нацыянальную сертыфікацыю, а пакінуць еўрапейскія і амерыканскія сертыфікаты. Калі яны ёсць, адразу браць лекі і карыстацца імі, а не рэгістраваць іх тут цягам года, каб праверыць, ці яны працуюць на беларусах. Паверце, калі працуе на немцах ці англічанах, спрацуе і на беларусах».

Валер Цапкала даў прэс-канферэнцыю. «Белсат» ладзіў СТРЫМ

Адказваючы на пытанне пра пенсіі, Валер Цапкала падкрэсліў, што катэгарычна супраць падвышэння пенсійнага ўзросту, што 60 гадоў для мужчынаў, а 55 – для жанчын – гэта аптымальны ўзрост сысці на адпачынак. Памер жа пенсіяў мусіць быць 450–500 долараў у эквіваленце.

Валер Цапкала на пікеце ў Бабруйску. Фота: «Белсат»

Пра Ціханоўскага, кампрамат Лукашэнкі і беларускую мову

«Што вы зрабілі, каб адпусцілі Ціханоўскага?» – пыталіся бабруйцы.

«Учора мы зрабілі тое, што маглі: паставілі подпіс за Святлану Ціханоўскую, – адказваў Цапкала.

Валер Цапкала размаўляе з жыхарамі Бабруйску. Фота: «Белсат»

«Пра які кампрамат казаў Лукашэнка і за што ён вас звольніў?» – было наступнае пытанне.

«Не ведаю, няхай публікуе, – адказваў Цапкала. – У яго запытайцеся пра звальненне. Гэта было звязана з маім выступам супраць пасадак бізнесменаў, таго ж Пракапені. У мяне быў сур’ёзны канфлікт з генеральным пракурорам з гэтай нагоды. Звольнілі спачатку мяне, потым Якубовіча, галоўнага рэдактара «Советской Белорусии». Пачытайце там маё інтэрв’ю. Яно вельмі злое, гэта было якраз тры гады таму. Пачытайце – і ўсё зразумееце».

Валер і Вераніка Цапкалы на пікеце ў Бабруйску. Фота: «Белсат»

У адказ на пытанне пра беларускую мову Валер Цапкала паабяцаў, калі стане прэзідэнтам, размаўляць на роднай мове.

«Я не вельмі добра размаўляю па-беларуску, але абяцаю, што буду старацца ўзгадаць свой багаж. У мяне, дарэчы, па рускай мове была чацвёрка у школе, а па беларускай мове і літаратуры – пяць. Абяцаю навярстаць і размаўляць па-беларуску».

НА belsat.eu

Hавiны