Польскае ведамства асудзіла напад Расеі на караблі Украіны ў Керчанскім праліве і заклікала бакі да стрыманасці.
«Мы рашуча асуджаем агрэсіўныя дзеянні Расеі, мы заклікаем яе ўлады паважаць міжнароднае права, а абодва бакі – да стрыманасці ў цяперашняй сітуацыі, якая можа паставіць пад пагрозу стабільнасць еўрапейскай бяспекі», – заявілі ў польскім дыпламатычным ведамстве.
У МЗС Польшчы адзначылі, што пасля незаконнай акупацыі Крыму, распальвання канфлікту на Данбасе, будаўніцтва Керчанскага моста без згоды ўладаў у Кіеве, Расея парушыла прынцып свабоды суднаходства.
«Сённяшняя драматычная эскалацыя напружанасці ў водах Азоўскага мора, у выніку якой параненыя маракі і пашкоджаны караблі ВМС Украіны, стала следствам паслядоўных парушэнняў Расеяй асноўных прынцыпаў міжнароднага права, у тым ліку ў парушэнні тэрытарыяльнай цэласнасці і суверэнітэту Украіны», – гаворыцца ў заяве.
***
Напярэдадні тры ўкраінскія караблі з ужываннем зброі захапіў расейскі спецназ у раёне Керчанскага праліва. Паводле ўкраінскіх медыяў, агулам Расея ўзяла ў палон ад 20 да 23 чалавек, 6 маракоў параненыя.
ФСБ сцвярджае, што украінскія караблі парушылі расейскую мяжу, бо не падавалі заяўкі на праход у праліве. Украіна кажа, што папярэджвала аб праходзе судоў, але не атрымала адказу.
Сёння Вярхоўная Рада разгледзіць пытанне пра ўвядзенне ў краіне ваеннага становішча. Напярэдадні такое рашэнне прыняў Савет нацыянальнай бяспекі Украіны.
Таксама 26 лістапада пройдзе экстранае пасяджэнне Савету Бяспекі ААН, якое склікаюць з ініцыятывы ўкраінскага і расейскага боку.
НАТО і Еўразвяз заклікалі Расею і Украіну да стрыманасці.
ДР belsat.eu