Амерыканскія войскі ў Польшчы размесцяцца ў шасці лакацыях. Пра гэта па выніках перамоваў у ЗША распавёў польскі міністр нацыянальнай абароны Мар’юш Блашчак, паведамляе Польскае радыё.
Паводле міністра, наяўнасць амерыканскіх войскаў у Польшчы мусіць застрашыць магчымага агрэсара.
«Магчымы нападнік мусіць разумець, што парушэнне межаў Польшчы азначае не лакальны, а глабальны канфлікт. Прысутнасць амерыканскіх войскаў ёсць гарантам таго, што атака на Польшчу будзе атакай на ўвесь хаўрус НАТО», – распавёў Мар’юш Блашчак.
Дакладныя месцы знаходжання амерыканскіх жаўнераў у Польшчы пакуль не вызначаныя. Яны мусяць быць зацверджаныя абедзвюма краінамі.
На мінулым тыдні прэзідэнты Польшчы і ЗША падпісалі пагадненне пра перавод у Польшчу каля 1000 дадатковых амерыканскіх жаўнераў. Зараз у гэтай краіне служаць каля 4500 вайскоўцаў ЗША.
МГ belsat.eu