Польшча 11 лістапада адзначае 101-ю гадавіну аднаўлення незалежнасці. Афіцыйная назва гэтага дня – Нацыянальнае свята незалежнасці Польшчы.
Традыцыйна ў гэты дзень адбываюцца шматлікія ўрачыстыя імпрэзы і акцыі. Раніцай прэзідэнт Анджэй Дуда ўсклаў кветкі да помніку Юзафу Пілсудскаму і іншым выбітным палякам, што ўдзельнічалі ў аднаўленні незалежнасці.
У Варшаве сёння адбыўся марафон за незалежнасць. Цяпер у польскай сталіцы праходзіць «Марш незалежнасці».
Аляксандр Лукашэнка павіншаваў Анджэя Дуду са святам незалежнасці і заявіў, што Беларусь зацікаўлена ў пашырэнні сувязяў з Польшчай па пытаннях рэгіянальнай і міжнароднай бяспецы.
Нацыянальнае свята незалежнасці – дзяржаўнае свята ў Польшчы, якое адзначаецца ў памяць аб вяртанні незалежнасці краіны ў 1918 годзе. 11 лістапада 1918 года кайзераўская Германія капітулявала ў Першай сусветнай вайне, у Польшчы было сфармаванае першы дэмакратычны ўрад, а Юзаф Пілсудскі стаў першым кіраўніком польскай дзяржавы.
Упершыню 11 лістапада стала дзяржаўным святам у Польшчы ў 1937 годзе, але пасля Другой сусветнай вайны камуністычныя ўлады скасавалі гэтае свята. Яно было адноўлена ў 1989 годзе ў перыяд разбурэння камуністычнай сістэмы.
ІІ belsat.eu