Што мы ведаем пра нашага заходняга суседа? І што, апроч гісторыі, нас яднае?
«Я сам не паляк, але захапляюся Польшчай і польскім футболам. Мой кумір – Робэрт Левандоўскі. Хваляваўся за Польшу, калі яна гуляла ў Еўра».
«Я люблю польскіе песні, я рос возле Польші, среді поляков. Для меня это почті родное»
Прыгадаць знаёмыя матывы або ўпершыню адкрыць для сябе свет польскай культуры можна было сёння ў Верхнім горадзе на плошчы каля Ратушы. Свята польскай культуры першае ў Менску, але не адзінае, якое зладзілі ў Беларусі. Элементам, які задаваў тон усёй імпрэзе, сталася, безумоўна,музыка. Майстар-класы традыцыйных танцаў, выступы прафесійных калектываў і ўсе гэта па-польску ці па-беларуску.
ГЕНАДЗЬ ЯРАШ, ГАРМАНІСТ АНСАМБЛЮ «АСАЛОДА»
«Прывезлі розныя песні і танцы, у нас розныя нацыянальнасці – і палякі і грузіны і ўзбекі».
Дарэчы, сёння ў Беларусі жывуць каля 300 тыс. палякаў. Гэта трэцяя з колькасці нацыянальнасць, з якой калісьці беларусы будавалі супольную дзяржаву. Грошы тых часоў – часоў Рэчы Паспалітай – дэманстравалі на сённяшнім свяце.
Яшчэ адзін з важных кампанентаў культуры – нацыянальная кухня. А таму не абышлося без сапраўднай дэгустацыі: знакамітыя флякі, журэк, бігас ды…
ЮЛІЯ, АФІЦЫЯНТКА:
«Пляцкі, памазанка і… хренавуха».
Цягам дня на плошчы працаваў кірмаш, на якім свае працы прэзентавалі больш за 30 майстроў. Кераміка, дрэва ці тканіна – нават самы пераборлівы пакупнік не сышоў бы ад рамеснікаў з пустымі рукамі.
Вольга Сауле belsat.eu
