На менскай плошчы Перамен адбываецца акцыя памяці мясцовага жыхара Рамана Бандарэнкі, які быў збіты напярэдадні, а сёння ўвечары памёр у шпіталі.
23:35. Міліцыянты пабілі шкло ў адной з машынаў, паведамляе motolkohelp.
23:25. На плошчы Перамен заклікаюць заставацца на бестэрміновы пратэст. Людзей заклікаюць падвозіць цёплыя рэчы, ваду, намёты.
23:15. Падчас акцыі на плошчы Перамен адзін з удзельнікаў заклікаў усіх, нягледзячы на страх і цяжкасці, выходзіць і не здавацца.
23:05. Антон Матолько паведамляе, што адкрытая магчымасць дапамагчы сваякам Рамана Бандарэнкі. Зрабіць гэта можна па спасылцы.
23:00. Дзясяткі людзей прывязваюць прывезеныя стужачкі туды, адкуль учора зрэзалі іх сілавікі.
22:55. На заўтра, 13 лістапада, у Беларусі абвешчаная неафіцыйная жалоба. Хвіліны маўчання і царкоўнага перазвону запланаваныя а 12:00.
А 18:30 у менскім архікатэдральным касцёле адбудзецца імша за загінулага Рамана Бандарэнку. У гарадзенскім кафедральным праваслаўным сабору паніхіду будуць служыць а 10:15.
22:27. Усе бліжэйшыя вуліцы каля плошчы Перамен забітыя людзьмі: Асіпенкі, Чарвякова, Гая, Даўгінаўскі тракт, бульвар Шаўчэнкі! Людзі ідуць адусюль. Кіраўніцтва ДАІ запытала дапамогу экіпажаў з усіх раёнаў Менску. У дварах вакол плошчы Пераменаў ладзяць засады сілавікі, піша motolkohelp.
22:20. Хрысціянская група Каардынацыйнай рады абвясціла пра памінальны перазвон заўтра 12:00 у памяць аб нявінна забітым Рамане Бандарэнку.
22:15. На плошчы Перамен людзі скандуюць «Жыве Беларусь!», «Мы спынім гэты фашызм».
22:10. Гібель Рамана Бандарэнкі пракаментаваў каталіцкі біскуп Юрый Касабуцкі: «Яшчэ адна ахвяра тэрору і насілля ў нашай роднай шматпакутнай Беларусі… Раман Бандарэнка… Вечны супакой дай яму, Пане, а святло вечнае няхай яму свеціць. Requiescat in pace..».
22:05. Мікрааўтобусу з невядомымі ў масках заблакавалі дарогу ў «Плошчы пераменаў». Адзін з сілавікоў дастаў зброю і цэліўся ў людзей. Але людзі не спалохаліся і не адыходзілі.
22:00. Акцыі салідарнасці праходзяць у Менску (Серабранка, Раманаўская слабада, велазавод, Зялёны луг, Сухарава), у Ляскоўцы, Дзяржынску, Горадні, Сокале.
21:55. На вуліцы Чарвякова і праспекце Дзяржынскага людзі становяцца ў ланцугі салідарнасці.
Каля плошчы Пераман пяцібальны корак.
21:50. На 13 лістапада на 12:00 у Беларусі абвешчаная хвіліна маўчання памяці Рамана Бандарэнкі.
«Відавочна, што адказнасць за смерць Рамана Бандарэнкі ляжыць на міністэрстве ўнутраных справаў і тых, хто аддаваў міліцыі загад «закруціць гайкі». Улады правакуюць яшчэ большую напружанасць паміж імі і народам», – заявіў праваабаронца Алесь Бяляцкі.
21:45. Каля плошчы Перамен людзі блакуюць праезд тэхнікі сілавікоў.
21:40. Каля больніцы хуткай медычнай дапамогі, дзе памёр Раман Бандарэнка, утварыўся ланцуг салідарнасці.
З чаго пачалося?
Цяпер на Плошчы Перамен сабраліся людзі, каб ушанаваць памяць Рамана Бандарэнкі.
Туды з розных канцоў Менску едуць людзі. На пад’ездах да плошчы ўтварыліся коркі.
Людзі на плошчы Перамен скандуюць «Трыбунал», «Не забудем, не простим!».
Таксама абвешчаная хвіліна маўчання.
Агулам на плошчы некалькі тысяч чалавек.
Паведамляецца таксама, што мікрааўтобусы з сілавікамі едуць у бок плошчы Перамен.
Людзі атачылі аўтобус з сілавікамі, якія прыехалі на плошчу Перамен. Крычаць «Фашысты!».
Не толькі на плошчы Перамен
Людзі таксама ставяць свечкі на вокны, каб ушанаваць памяць Рамана Бандарэнкі.
Святлана Ціханоўская заклікала ўшанаваць імя Рамана Бандарэнка ланцугамі памяці:
«Няма нічога страшней за смерць нявіннага чалавека. Няма нічога горш, чым хаваць уласнае дзіця. Няма нічога больш бесчалавечнага за тэрор супраць уласнага народа. Мы не можам вярнуць жыццё Рамана Бандарэнкі, але мы можам ушанаваць яго імя хвілінай маўчання і ланцугамі памяці заўтра ў 12 гадзін у кожным раёне кожнага гораду. Давайце зробім гэта дзеля чалавека, якога забілі за тое, што ён хацеў жыць у вольнай краіне».
Сястра загінулага Рамана Бандарэнкі распавяла пра смерць брата:
«Я запісваю гэта відэа, каб вялікая колькасць людзей даведалася, што адбываецца ў гэтай краіне, што людзі абсалютна безабаронныя», – сказала яна.
(абнаўляецца)
МГ belsat.eu
