Фільмы «Чыстае мастацтва» Максіма Шведа і «Summa» Андрэя Куцілы, зробленыя сумесна з нашым телеканалам, пакажуць 6 лістапада ў рамках кінафестывалю «Лістапад». Квіткоў на сеансы ўжо няма, паведамляюць арганізатары.
Фільм «Чыстае мастацтва» рэжысёра Максіма Шведа, беларуская прэм’ера якога адбудзецца на «Лістападзе», даследуе феномен ЖЭС-арту.
Маляры ЖЭСа Зіна і Іна старанна зафарбоўваюць на сценах Менску надпісы, пакідаючы пасля сябе рознакаляровыя прамавугольнікі. Натхнёны гэтымі яскравымі фігурамі, мастак-абстракцыяніст Захар Кудзін выходзіць на гарадскі пленэр. Назіраючы за нараджэннем арт-феномену, фільм з іроніяй і любоўю паказвае сучасную Беларусь і ўздымае пытанні, актуальныя не толькі для нашай краіны.
У мінулую суботу Максім Швед атрымаў прыз за лепшую рэжысуру на кінафестывалі «АРТДОКФЕСТ» у Рызе.
Фільм «Summa» Андрэя Куцілы ўжо мае шмат узнагарод прэстыжных міжнародных кінафестываляў, уключаючы прыз за лепшы сярэднемятражны фільм на кінафестывалі ў Амстэрдаме (IDFA).
Паводле сюжэту, маладая беларуская мастачка едзе ў Польшчу ў госці да свайго сябра, пажылога мастака Анджэя Струміла. Гэтая паездка дае ёй магчымасць адцягнуцца ад гарадской мітусні, яму – забыцца пра адзіноту. Маляванне, размовы, верхавая язда, хатнія справы – прыемнае баўленне часу ў асабняку Анджэя перарываецца толькі званкамі мужа мастачкі, які просіць яе вярнуцца дадому. Але яна хоча застацца даўжэй: тут засталіся няскончаныя справы…
Абодва фільмы паўсталі пры ўдзеле тэлеканалу «Белсат».
Расклад фільмаў Нацыянальнага конкурсу кінафестывалю «Лістапад» у кінатэатры «Беларусь» можна паглядзець вось тут.
КА belsat.eu