Ператрусы, паліграф, штрафы, звальненні нібыта па ўласным жаданні. Як ціснуць на медыкаў Бабруйску

Да былой медсястры Бабруйскага міжраённага анкалагічнага дыспансера Ілоны Златкінай міліцыя прыехала разам з МНС – хацелі ўзламываць дзверы, калі жанчына доўга не адчыняла. Пасля ператрусу бабруйчанку да вечара трымалі спачатку ў РАУСе, потым у Следчым камітэце. Яшчэ адну медсястру з Бабруйску – Ірыну Іванчыкаву – у той жа дзень запрашалі на размову наконт пагроз у тэлеграм-канале.

«Да дому пад’ехала пажарная, за дзвярымі пачалі заводзіць «балгарку»

Пераслед і рэпрэсіі ў дачыненні да абедзвюх бабруйскіх медсясцёр – Ілоны Златкінай і Ірыны Іванчыкавай – пачаўся яшчэ 4 кастрычніка, калі жанчын затрымалі падчас мірнага шэсця ў родным горадзе. Тады яны правялі ноч у ІЧУ, на наступны дзень іх судзілі, далі штрафы.

Ілона Златкіна. Фота: архіў героя

Ілона Златкіна працавала медсястрой аддзялення камп’ютарнай тамаграфіі ў Бабруйскім міжраённым анкалагічным дыспансеры. Амаль адразу пасля эпізоду з затрыманнем і судом ёй прапанавалі звольніцца. Жанчына не стала абвастраць сітуацыю і напісала заяву па згодзе бакоў.

23 снежня, калі Ілона з мужам былі дома, каля 11-й гадзіны раніцы раптоўна з’явілася міліцыя. Супрацоўнікі грукаліся ў дзверы. Як распавяла жанчына, яны з мужам спачатку вырашылі зрабіць выгляд, што дома нікога няма. Але праз некаторы час сужонкі пабачылі, як да іх дома пад’язджае пажарная машына, а пасля пачулі, як на лесвічнай пляцоўцы нехта «заводзіць балгарку». Каб пазбегнуць узлому дзвярэй, Ілона адчыніла.

«Вы элементарны зэк». Медыкаў працягваюць звальняць

Супрацоўнікі прад’явілі пастанову на вобшук, патлумачылі, што мусяць яго правесці ў рамках крымінальнай справы аб паклёпе на на галоўную лекарку Бабруйскай цэнтральнай больніцы Аксану Крупеніч. Маўляў, ёсць падазрэнне, што гэта менавіта Ілона размясціла ў нейкім тэлеграм-канале пасты пра тое, што па загадзе Крупеніч у Бабруйску звальняюць медыкаў.

У сям’і Златкіных забралі ноўтбук, флэшкі, у Ілоны канфіскавалі тэлефон.

«Мяне ўсю трэсла, а мне казалі – паліграф зашкальвае, бо я хлушу»

Пасля ператрусу Ілону павезлі ў аддзяленне міліцыі Ленінскага раёну г.Бабруйска, там апыталі на паліграфе.

«Я пагадзілася на дэтэктар, бо мне няма чаго хаваць, але тым не менш, мне ўвесь час падчас апытання спрабавалі давесці, што я хлушу, бо ў мяне там нешта «зашкальвае», – распавяла медсястра. – Дык а што яны хацелі ў такім стане, у якім я была? Мяне ўсю трэсла».

З РАУСа Ілону даставілі ў Следчы камітэт. Толькі там жанчыне патлумачылі, што яна праходзіць сведкай, а не падазраванай па крымінальнай справе аб паклёпе на галоўнаю лекарку Бабруйску. Следчы пацвердзіў, што справа ў размешчанай у Telegram інфармацыі, што нібыта бабруйскія медыкі звольненыя па загадзе Аксаны Крупеніч.

Ілона Златкіна кажа, што яна бачыла такія пасты ў Telegram, нават дзялілася імі з сябрамі, але сама іх не пісала.

Златкіна пасля выхаду з ІЧУ, фота: «Вечерний Бобруйск»

Цэнтр занятасці накіраваў туды, адкуль папрасілі звольніцца

Пасля звальнення былая медсястра стала на ўлік у Цэнтры занятасці насельніцтва, нават хадзіла па накіраваннях, якія ёй там давалі. Але кажа, што хутка зразумела, што не хоча «вяртацца ў старую сістэму».

Аднойчы Ілона атрымала ад цэнтру занятасці накіраванне на вакансію медсястры ў аддзяленне тамаграфіі ў анкадыспансеры – на сваё былое працоўнае месца. Ілона кажа, што яна там была адзінай медсястрой, і пасля яе сыходу вакансія працяглы час заставалася адкрытай.

Жанчына вырашыла схадзіць да былых калегаў з «паперкай» з цэнтру занятасці.

«У аддзеле кадраў не ведалі, што рабіць, калі я прыйшла з гэтым накіраваннем, – узгадвае Ілона. – Пабеглі да галоўнага лекара, а праз дзень я атрымала адказ, што вакансіяў няма».

Асудзілі, прымусілі звольніцца, запрашаюць у міліцыю

Бабруйчанка Ірына Іванчыкава таксама, як і Ілона Златкіна, пасля затрымання 4 кастрычніка правяла ноч у ІЧУ, на наступны дзень была аштрафаваная на 10 базавых. Жанчына працавала медсястрой у аперацыйным блоку хірургічнага аддзялення ў Бабруйскай цэнтральнай больніцы. Праз два тыдні пасля суду яе папрасілі звольніцца «па згодзе бакоў». Ірына гэтак жа, як і Ілона, не стала спрачацца, і напісала заяву. Пасля звальнення жанчына хутка знайшла новую працу.

Узровень судовых рэпрэсіяў расце

23 снежня раніцай Ірыне патэлефанавалі з міліцыі і запрасілі на размову наконт нейкіх пагрозаў у адным з тэлеграм-каналаў. Бабруйчанка адмовілася ісці, бо была на працы. Пра якія пагрозы была мова, Ірына не ведае, па тэлефоне ёй нічога не патлумачылі.

Гэта не адзіныя выпадкі ціску на медыкаў у Бабруйску. У лістападзе быў вымушаны звольніцца лекар-гігіеніст з Бабруйскага занальнага цэнтру гігіены і эпідэміялогіі Леанід Кошань. Супрацоўнікі міліцыі забралі медыка з працоўнага месца – выклікаў іх галоўны лекар цэнтру Дзмітрый Лайтэр за фота Леаніда з бел-чырвона-белым сцягам каля будынку санстанцыі. Гігіеніст правёў ноч у ІЧУ, быў аштрафаваны.

Акрамя, увосень пасля суду і штрафу па арт.23.34 КаАП была звольненая санітарка адной з мясцовых лякарняў, актывістка і шматдзетная маці Галіна Лазарава.

Ганна Ганчар, belsat.eu

Падпісвайся на telegram Белсату

Hавiны