Перамовы Лукашэнкі і Пуціна ў Сочы будуць доўжыцца тры дні


Лукашэнка і Пуцін падчас мінулых перамоваў, 29 снежня 2018 г. Фота - president.gov.by

Перамовы ў Сочы, на якія 12 лютага ўвечары прыляцеў Аляксандра Лукашэнка, будуць доўжыцца тры дні. Пра гэта паведаміў прэс-сакратар Пуціна Дзмітрый Пяскоў.

«Лукашэнка і Пуцін будуць дачыняцца ўвесь дзень сёння, заўтра таксама будуць стасавацца і ў пятніцу. У складзе расейскай дэлегацыі – [віцэ-прэм’ер Дзмітрый] Козак, [памочнік прэзідэнта Юрый] Ушакоў, [кіраўнік Міністэрства эканамічнага развіцця Максім] Арэшкін, [пасол Расеі ў Менску Міхаіл] Бабіч », – цытуе Пяскова РБК.

Парадак дня будзе цалкам прысвечаны двухбаковым стасункам.

Лукашэнка ў аэрапорце Сочы, 12 лютага. Фота – president.gov.by

Як раней заяўляў Дзмітрый Пяскоў, падчас сустрэчы ў Сочы, прэзідэнты абмяркуюць дзейнасць расейска-беларускай працоўнай групы, створанай для разгляду інтэграцыйных працэсаў у межах Саюзнай дзяржавы, а таксама спрэчных пытанняў. Пра новую сустрэчу прэзідэнты дамовіліся 31 студзеня ў ходзе тэлефоннай размовы.

  • Напрыканцы 2018 года беларуска-расейскія стасункі заўважна пагоршыліся. У снежні Аляксандр Лукашэнка некалькі разоў праводзіў перамовы з Уладзімірам Пуціным: расейскі лідар патрабаваў «глыбокай інтэграцыі», а Лукашэнка дамагаўся зніжэння цаны на газы і кампенсацыі за падатковы манеўр. Перамовы скончыліся безвынікова.
  • Падатковы манеўр, які плануе рэалізаваць Расея, прадугледжвае, пачынаючы з 2019 года, паэтапнае ануляванне экспартных мытаў на нафту пры адначасовым павышэнні падатку на здабычу карысных выкапняў. У выніку з 2024 года Беларусь будзе закупляць сыравіну па сусветных коштах і пазбавіцца перавагі над канкурэнтамі па-за межамі ЕАЭС. Паводле міністра фінансаў Беларусі Максіма Ермаловіча, агульныя страты бюджэту краіны ад падатковага манеўру 2019-га да 2024 года могуць скласці $ 8–12 млрд. Менск хоча атрымаць ад Масквы кампенсацыю за падатковы манеўр, але расейскі бок на гэта пакуль не пагадзіўся.
  • Цана на газ для Беларусі – яшчэ адно спрэчнае пытанне ў беларуска-расейскіх стасунках. У 2018 годзе Беларусь купляла газ па фіксаванай цане $ 129 за тыс. куб.м. У 2019 годзе гэтая цана будзе $ 127. Цана на 2020 год яшчэ не вызначаная. Аляксандр Лукашэнка патрабуе, каб Беларусі далі магчымасць купляць газ па ўнутрырасейскім цэнам – па $ 70, як у Смаленскай вобласці. У Расеі лічаць такі варыянт магчымым толькі ва ўмовах больш шчыльнай інтэграцыі – гэта асноўная думка так званага ультыматуму Мядзведзева.
  • Ультыматум Мядзведзева – заява прэм’ер-міністра РФ на паседжанні Савету Міністраў Саюзнай дзяржавы, паводле якой на эканамічныя датацыі (у прыватнасці, праз адзіную палітыку тарыфаў і цэнаў) Беларусь можа разлічваць толькі ў выпадку рэалізацыі дамовы аб стварэнні Саюзнай дзяржавы ад 8 снежня 1999 года. У прыватнасці, гаворка ідзе пра стварэнне адзінага эмісійнага цэнтру, адзінай мытні, суду і падліковай палаты. У адказ Аляксандр Лукашэнка 14 снежня заявіў, што Беларусь ніколі не адмовіцца ад свайго суверэнітэту. «Калі нас хочуць, як Жырыноўскі прапаноўваў, падзяліць на вобласці і ўпіхнуць у Расею – гэтага не будзе ніколі», – падкрэсліў ён.

ІІ, belsat.eu

Глядзі таксама
Каментары