Зянон Пазняк лічыць, што ў беларускім ПЭН-цэнтры «загучала нянавісць да Бога», а сама арганізацыя была разваленая «групай дэвіянтаў». Пра гэта ён напісаў на сайце «Беларуская салідарнасць» у артыкуле, прысвечаным скандалу з выключэннем Паўла Севярынца.
«Выпадкі ў розных краінах і ў розных частках свету паказваюць, што дастаткова легалізаваць і вывесці з-пад дзеяння закону нават самую мізэрную крымінальную групу, як яна тут жа сядае на галаву ўсяго грамадства, пачынае пампаваць свае дазволеныя неадэкватныя правы і нішчыць асяроддзе», – піша Пазняк.
Паводле ягоных словаў, гэта адбылося ў дэмакратычных краінах, дзе «легалізавалі гомасексуалістаў».
«На Захадзе невялікая гомасексуальная група (якая адразу згуртавалася па ўсім свеце), як правіла, імкнецца пранікнуць у ключавыя пазіцыі структур і адтуль уплываць на паводзіны нармальных людзей, не спыняючыся (калі ўзнікае магчымасць) перад ціскам, прапагандай, скандаламі, паклёпам ды псіхічным тэрорам», – мяркуе палітык.
На думку Пазняка, сённяшнія беларускія ўлады «выкарыстоўваюць збачэнцаў дзеля развалу нацыянальнай грамадзянскай супольнасці, якая рэжыму непатрэбная».
«Ілюстрацыяй да гэтага служыць нядаўні скандал у беларускай арганізацыі ПЭН-цэнтру. Літаральна пару дэвіянтаў, якія туды праніклі, развалілі ўвесь так званы «цэнтр». Відаць, упершыню адкрыта загучала там нянавісць да хрысціянства, да Бога і да ўсяго беларускага», – сцвярджае ён.
Пазняк мяркуе, што арганізацыю варта распусціць «як неспрыяльную культуры, свабодзе, дэмакратыі і беларускім нацыянальным інтарэсам».
«Зразумела, гэтага не адбудзецца. Дый рэжыму патрэбна, каб паздзекваецца са «свядомых», якія там «жужжаць», хто лепшы педэраст», – робіць выснову Пазняк.
Нагадаем, Паўла Севярынца выключылі з ПЭН-цэнтру 29 кастрычніка пасля паседжання Рады. Севярынца на паседжанні не было.
КА belsat.eu