Пасылкі з Кітаю абвалілі беларускі гандаль і перашкаджаюць айчыннай прамысловасці
Кіраўнік Беларусі ўвёў новыя ліміты на пасылкі з замежных інтэрнэт-крамаў: не больш за € 22 і 10 кг у месяц.
Правілы атрымання пасылак па бязмытнай працэдуры ўтрымліваюцца ва ўказе №40, які 11 лютага падпісаў Аляксандр Лукашэнка.
У выпадку, калі замежная пасылка не будзе адпавядаць новым лімітам, то мыта на яе складзе 30 %.
Стары ліміт у € 200 (будзе актуальны яшчэ прыкладна два месяцы) быў уведзены ў ліпені 2014 года.
Адным з галоўных ініцыятараў увядзення новых лімітаў быў старшыня Савету Рэспублікі Міхаіл Мясніковіч. Ён заявіў, што пасылкі з Кітаю абвалілі беларускі гандаль і стварылі праблемы для прамысловасці.
Ацэначны кошт пасылак з таварамі з-за мяжы, якія замаўляюцца праз інтэрнэт-крамы, наўмысна заніжаецца, мяркуе старшыня Савету Рэспублікі Міхаіл Мясніковіч.
«Яны ацэньваюцца ў $5, $10… Хаця на самай справе фактычны кошт зусім іншы, таму бюджэт недаатрымлівае ПДВ, мыты. Я не супраць таго, каб куплялі гэта, але ідзе проста падлог фактычнага кошту. Што дае магчымасць адыходзіць ад мытаў, плацяжоў і гэтак далей», – заявіў у лістападзе 2015-га Міхаіл Мясніковіч на пасяджэнні маніторынгавай групы па разглядзе праектаў указаў Прэзідэнта Беларусі і законаў у Савеце Рэспублікі.
Сёлета кіраўнік айчыннага Мытнага камітэту Беларусі Юрый Сянько заявіў, што колькасць пасылак з інтэрнэт-крамаў расце ў геаметрычнай прагрэсіі. Паводле чыноўніка, за апошнія чатыры гады іх стала ў 20 разоў больш.
Цягам апошніх гадоў у Беларусі назіраўся бум на пакупкі ў азіяцкіх інтэрнэт-крамах. Беларусы набывалі там практычна ўсё: ад гаджэтаў да бялізны. У 2015-м у нашу краіну прыйшло амаль 7 млн замежных пасылак, і 70 % з іх – гэта пакупкі ў замежных інтэрнэт-крамах.
У Расеі і Казахстане дзейнічаюць наступныя ліміты на замежныя пасылкі: € 1000 і да 31 кг у месяц на тавары для асабістага карыстання.
Указ №40 уступае ў сілу праз два месяцы пасля яго афіцыйнага апублікавання.
