Пастка для дыктатара «па схеме БЧБ»

Аляксандр
Гелагаеў
гісторык, вайсковы аглядальнік

Яшчэ некалькі месяцаў таму сімвалам змагання з дыктатураю быў нацыянальны бел-чырвона-белы сцяг, потым на нейкі час да яго далучылася белая стужка. Каб прыцягнуць увагу «органаў», трэба было выйсці на вуліцу і ўзняць сцяг.

Цяпер, каб атрымаць 15 содняў ці штраф, дастаткова звычайнай каляднай бела-чырвонай гірлянды на акне. І гэта вельмі прыкрая сітуацыя… для дыктатара.

Чаму яны так дзейнічаюць?

Улады пачалі жорсткае змаганне з любымі публічнымі праявамі незадаволенасці грамадзянаў – паводле прынцыпу «чаго не відаць, таго і няма». Тут ёсць свая логіка – там, дзе не відаць таго, што нехта іншы ўжо супраціўляецца, табе пачаць супраціў цяжэй. Ты не адчуваеш, што ты не самотны, не адчуваеш прысутнасці аднадумцаў.

Малюнак: Дэ Лёс для Белсат

Адначасова, канечне, АМАПу дый простым лукашыстам маральна цяжка быць у раёнах, дзе ў вокнах аніводнага чырвона-зялёнага сцяга, затое на кожным другім-трэцім акне – бел-чырвона-белы. Яны пачуваюцца як на чужой, варожай тэрыторыі, яны – у меншасці, ім банальна страшна.

Разбураюцца міфы прапаганды. Бо адразу відаць, за каго народ – і супраць каго.

Таму ідзе татальная супрацьзаконная зачыстка публічнай прасторы (нават калі гэта вашае прыватнае акно) ад усёй бел-чырвона-белай сімволікі.

Сіла і слабасць беззаконня

Вядома, непрыемна, што дзяржаўныя структуры так ці інакш пакуль выконваюць незаконныя загады, каб дагадзіць аднаму чалавеку і купцы ягоных прыкарытнікаў. Сярод іншага гэта відавочнае беззаконне разбурае аўтарытэт самой беларускай дзяржаўнасці.

Малюнак: Дэ Лёс для Белсат

Сіла беззаконня ў тым, што няма правілаў гульні – вас могуць пакараць за што заўгодна, калі падазраюць нелаяльнасць. Аднак у гэтым жа і слабасць. «Ну вы ж самі ўсё разумееце?» – «Так, разумею. Але ж і вы таксама разумееце».

Беззаконне знішчае аўтарытэт таго, хто яго чыніць. І заклікае астатніх змагацца.

Акрамя таго, з пэўнага моманту татальнасць пераследу стала контрпрадуктыўнай. За сцягамі на вуліцах пад пераслед трапілі стужкі, кветкі, жаночыя сукенкі ў «нелаяльных колерах», малыя архітэктурныя формы, сцягі на дамах, сцягі на вокнах. Нарэшце – проста любыя «рэчы па схеме БЧБ» на балконах.

Муж затрыманай у Горадні «БЧБ-нявесты»: «Сукенка пры ёй. Трымаецца, спявае песні»

Гэтак улады ўласнымі рукамі зрабілі сімвалам пратэсту амаль любую рэч «варожых» колераў. Ад майткоў да зефіркі.

Калі краіна загадае быць змагаром…

Леташні снегавік з чырвоным шалікам год таму нават не падазраваў, паводле якой «схемы» ён зроблены. Сёлетні снегавік нічым не адрозніваецца, але ўся вуліца цудоўна ведае, за што і супраць чаго ён змагаецца.

«Яны хацелі нас пахаваць, не ведаючы, што мы – насенне», – кажа адна песня. Літаральна так і атрымалася ў выніку змагання з бел-чырвона-белай сімволікай. І такіх сімвалаў вакол аказалася значна больш, чым было, калі ворагам былі толькі сцягі ў руках пратэстоўцаў.

Літаральна ўсё можа быць гэтым сімвалам. Цяпер, аказваецца, пратэстуе нават самая звычайная калядная гірлянда ў маім ліфце. Пра гэта ніхто гадамі не здагадваўся, затое цяпер увесь пад’езд усведамляе, што яна значыць.

У такім змаганні з ветрам масавага супраціву, які перарастае ў буру, немагчыма перамагчы. Цяпер кожны ў любым спалучэнні белага і чырвонага можа бачыць сімвал пратэсту – ад расфарбоўкі бетонамяшалак да кіпернай стужкі.

Дыктатура сама надае новае значэнне рэчам, якія раней пратэставага значэння не мелі.

Асабліва характэрна, што гэта здарылася якраз напярэдадні таго сезону, у які пануюць белая стыхія і барадаты мужчына ў чырвоным футры.

Белага і чырвонага не апранаць!

Аляксандр Гелагаеў belsat.eu

Меркаванне аўтараў можа не супадаць з пазіцыяй рэдакцыі.

Больш матэрыялаў