Прэзідэнт Украіны Пятро Парашэнка заявіў, што Украіна знаходзіцца пад пагрозай поўнамаштабнай вайны з Расеяй. Украінскі лідар адзначыў, што ў яго ёсць доказы перакідання да мяжы расейскіх войскаў.
Кіраўнік дзяржавы сказаў, што можа абгрунтаваць свае словах дадзенымі выведкі, паведамляе прэс-служба прэзідэнта. Пятро Парашэнка прадэманстраваў здымкі з спадарожніка, на якіх, паводле яго слоў, выяўлена расейская вайсковая база, размешчаная непадалёку ад мяжы з Украінай. Прэзідэнт адзначыў, што колькасць танкаў там за месяц вырасла ў тры разы.
«Колькасць падраздзяленняў, якія былі перадыслакаваныя ўздоўж нашай мяжы, прычым па ўсёй даўжыні, кардынальна ўзрасла. Пазіцыя адносна магчымых вучэнняў ніяк гэта павелічэнне не апраўдвае», – заявіў украінскі прэзідэнт.
Парашэнка адзначыў, што пасля інцыдэнту ў раёне Керчанскай пратоцы было неабходна забяспечыць адпор на выпадак шырокамаштабнага наземнага ўварвання.
«Я хачу, каб ніхто не думаў, што гэта забавы ці цацкі», – папярэдзіў Пятро Парашэнка.
Пра пагрозу сухапутнага ўварвання Парашэнка казаў і напярэдадні, абгрунтоўваючы сваё рашэнне перад дэпутатамі.
«Стрэльба, якая вісіць на сцяне, рана ці позна, але стрэліць. А тут – самалёты, верталёты, танкі, ракетныя комплексы, бронетранспарцёры, сістэмы залпавага агню», – заявіў ён, спасылаючыся на выведныя дадзеныя.
СК, belsat.eu
