Прыхільнік рэлігійнага руху «Сведкі Іеговы» Вячаслаў Баранос распавёў расейскаму тэлеканалу «Дождь», што людзі ў цывільным катавалі яго ў будынку ўпраўлення Следчага камітэту ў Сургуце.
«Яны звязалі рукі і ногі скотчам, паклалі ілбом на мокрую анучу, а на галаву надзелі сіні празрысты поліэтыленавы пакет. На мне сядзелі два-тры чалавекі, перыядычна вельмі балюча ціснулі. Пасля, трымаючы мяне, яны зацягнулі пакет. Калі я пачаў задыхацца, аслабілі яго і пачалі крычаць, каб я прызнаўся ў злачынстве. Калі мяне пачалі душыць, калі я задыхаўся, мне закрылі рот рукой і ўставілі паміж ягадзіцамі, імаверна, электрашокер. І ўключылі ток. Я роў, а не крычаў», – сказаў Баранос.
Мужчына таксама распавёў, што людзі з СК налівалі ваду на ягоныя джынсы ў вобласць пахвіны, і ўжывалі электрашокер. Ён адзначыў, што перыядычна гэта паўтаралася. «Пад канец білі нейкім прадметам па ікраножнай мышцы. Я звярнуўся ў траўмпункт, на абедзвюх нагах засталіся гематомы», – распавёў вернік.
Пра катаванні ў будынку Следчага камітэту ў Сургуце «Сведкі Іеговы» паведамілі 19 лютага на сваім сайце.
У прэс-службе СК гэтую інфармацыю зняпраўдзілі.
Вячаслава Бараноса і яшчэ 6 вернікаў затрымалі 15 лютага.
З 2017 года «Сведкі Іеговы» лічацца ў Расеі экстрэмісцкай арганізацыяй.