Марыя Калеснікава затрыманая, яна не ўязджала ва Украіну

Марыя Калеснікава. Менск, Беларусь. 24 жніўня 2020 г. Фота: Света Фар / belsat.eu

«Ва ўкраінскія пункты пропуску прыбылі двое грамадзянаў Беларусі – Краўцоў і Раднянкоў. Калеснікава ва ўкраінскія пункты пропуску для праходжання памежнага кантролю не прыбывала», – паведаміў belsat.eu прэс-сакратар ПСУ Андрый Дэмчанка.

Паводле Андрыя Дэмчанкі, зараз Краўцоў і Раднянкоў прайшлі усе неабходныя працэдуры для перасячэння ўкраінскай мяжы.

Сябраў КР вывезлі ва Украіну прымусова – МУС Украіны

Намеснік міністра ўнутраных справаў Украіны Антон Герашчанка пракаментаваў у Facebook выезд з Беларусі сябраў Каардынацыйнай Рады:

«Гэта не быў добраахвотны выезд. Гэта было гвалтоўнае выправаджэнне з роднай краіны. Марыю Калеснікаву не ўдалося выправадзіць з Беларусі. Гэтая смелая жанчына распачала дзеянні па перадухіленні яе перамяшчэння праз мяжу. Яна засталася на тэрыторыі Рэспублікі Беларусь. Усю адказнасць за яе жыццё і здароўе нясе персанальна Аляксандр Лукашэнка».

Калеснікава парвала пашпарт, каб яе не вывезлі з Беларусі – медыі

Сябра прэзідыума Каардынацыйнай рады Марыя Калеснікава не перасякла мяжу Украіны, бо пры спробе яе гвалтоўнага вывазу з тэрыторыі Беларусі яна парвала свой пашпарт.

«Пры спробе фактычнай дэпартацыі яна парвала пашпарт, і не магла быць прапушчана памежнікамі на тэрыторыю Украіны», – сказаў суразмоўца агенцтва «Інтерфакс-Україна».

Павел Латушка пацвердзіў TUT.BY інфармацыю, што Марыю Калеснікаву прымушалі пакінуць Беларусь, і на мяжы яна разарвала свой пашпарт.

Раніцаю 8 верасня з’явілася інфармацыя, што сябры Каардынацыйнай Рады Марыя Калеснікава, Іван Краўцоў і Антон Раднянкоў каля 4-ай гадзіны раніцы прайшлі кантроль на беларуска-ўкраінскай мяжы, пра гэта паведаміла БелТА са спасылкаю на прэс-сакратара Памежнага Камітэту Антона Бычоўскага.

«Антон Раднянкоў, Іван Краўцоў і Марыя Калеснікава ў раёне 4.00 праходзілі памежны кантроль у пункце пропуску» Аляксандраўка», – распавёў афіцыйны прадстаўнік Дзяржаўнага памежнага камітэту Антон Бычкоўскі.

Марыя Калеснікава не даступная для каментароў ад раніцы 7 верасня.

Пасля 9-ай гадзіны раніцы ў прэс-службе Памежнага камітэту пацвердзілі радыё «Свабода», што Краўцоў і Раднянкоў пакінулі тэрыторыю Беларусі, Марыя Калеснікава затрыманая. Паводле прэс-службы Памежнага камітэту, якую цытуе TUT.BY машына на якой ехалі Калеснікава, Краўцоў і Раднянкоў «стварыла пагрозу жыццю ваеннаслужачаму».

Чалец Каардынацыйнай Рады Максім Знак паведаміў журналістам радыё «Свабода», што Калеснікава не планавала пакідаць Беларусь.

Удзельніца прэзідыума Каардынацыйнай рады Марыя Калеснікава па дарозе на допыт у Следчы камітэт. 27 жніўня 2020 года. Фота: Таня Капітонава / Belsat.eu

7 верасня каля Нацыянальнага мастацкага музею невядомыя людзі пасадзілі Марыю Калеснікаву ў мікрааўтобус з надпісам «Сувязь» і павезлі ў невядомым кірунку. Увечары 7 верасня сваякі Марыі Калеснікавай падалі заяву ў міліцыю па факце знікнення.

Цяпер у Беларусі на волі застаюцца толькі 2 сябры прэзідыуму Каардынацыйнай Рады – гэта юрыст Максім Знак і Нобэлеўская лаўрэатка, пісьменніца Святлана Алексіевіч.

На мінулым тыдні была затрыманая чалец Каардынацыйнай рады Лілія Уласава, супраць яе заведзеная крымінальная справа.

Чальцы прэзідыуму Каардынацыйнай Рады Павел Латушка і Вольга Кавалькова зараз знаходзяцца за межамі Беларусі.

belsat.eu

Hавiны