Былая кіраўніца Нацыянальнага антыкарупцыйнага дырэктарату Румыніі Лаўра Кёвэшы можа стаць першаю кіраўніцаю Еўрапейскай пракуратуры. Ейную кандыдатуру 19 верасня падтрымалі 17 з 22 краінаў ЕЗ, якія ствараюць новае ведамства.
На наступным тыдні плануецца фармальна завершыць вылучэнне кандыдаткі. Затым дзяржавы ЕЗ мусяць афіцыйна зацвердзіць яе кандыдатуру, паведамляе Deutsche Welle.
Разам з тым супраць прызначэння Кёвэшы выступаюць улады ейнай роднай Румыніі, абвінавачваючы яе ў карупцыі, злоўжыванні службовымі паўнамоцтвамі і наданні несапраўдных звестак.
За пяць гадоў, якія Кёвэшы ўзначальвала Нацыянальнае антыкарупцыйнае ўпраўленне Румыніі, да суду за карупцыю былі прыцягнутыя тысячы чалавек: міністраў, медыямагнатаў, суддзяў, пракурораў, дэпутатаў і бізнесоўцаў. У 2015 годзе The Guardian назвала яе «ціхім, сціплым галоўным пракурорам, які прыносіць скальпы».
Пры гэтым Кёвэшы і яе ведамства часам вінавацяць у парушэнні правоў чалавека, у тым ліку незаконным праслухоўванні. У прыватнасці, яе шмат крытыкуюць чальцы ўрадавай кааліцыі з сацыял-дэмакратычнай партыі, супраць якой ведамства правяло шматлікія расследаванні.
Сама пракурор лічыць абвінавачванні часткай палітычнай кампаніі супраць яе. У 2018 годзе яны пакінула сваю пасаду.
Еўрапейская пракуратура павінна пачаць працу не пазней за 2021 год. Яна будзе расследаваць неправамернае выкарыстанне бюджэтных сродкаў ЕЗ і трансгранічныя махінацыі з ПДВ. Ствараюць ведамства 22 дзяржавы ЕЗ. Пазней да яго працы могуць далучыцца іншыя дзяржавы Еўразвязу.
МГ belsat.eu