Арт-аб’ект Андрэя Бусла з выявай цягніка метро, які на мінулым тыдні з’явіўся на сцяне галерэі паміж будынкамі 20 і 45 па вуліцы Куйбышава, у пятніцу завесілі рэкламай аднаго з брэндаў адзення. Арганізатарка фестывалю «Vulica Brasil», у межах якога паўстаў цягнік, патлумачыла «Белсату», што здарылася.
Міла Котка ўпэўненая, што сітуацыя – звычайнае непаразуменне.
«Мы ўзгаднілі ўсё на «Гарызонце», але крыху затрымаліся з рэалізацыяй, бо заданне было тэхнічна складаным. У месцы, дзе вісіць цягнік, нельга выкарыстоўваюць пад’ёмнік, бо пад галерэяй праходзіць тралейбусны кабель пад напружаннем. Таму трэба было запрашаць альпіністаў. Яны ў сваю чаргу мусілі чакаць, каб не было ветру і можна было працаваць бяспечна. Калі яны нарэшце пачалі там рабіць, прыйшлі іншыя альпіністы і сказалі, што будуць вешаць рэкламу. «Гарызонт» – буйная структура, там працуе мноства людзей і нехта можа не ведаць пра пэўныя дамоўленасці», – распавядае Міла Котка.
Паводле арганізатаркі фэсту, яна звязалася з дырэкцыяй «Гарызонту» і пачула ад іх дазвол на працяг працаў.
«Яны сказалі: «Вешайце – рэклама пачакае». Але ў выніку яны паглядзелі, што гэта было б вялікай стратай грошай: рэклама была ўжо надрукаваная, была дамоўленасць з альпіністамі і г. д. І мы знайшлі кампраміс: рэклама, за якую яны ўжо атрымалі грошы, усё ж такі павісіць згодна з кантрактам, а потым зноў вернецца наш арт. Мяне запэўнілі, што нашую працу не пакрыўдзяць і не сапсуюць: наш цягнік прыклеены да сцяны, а рэкламны банэр прымацаваны да металічных канструкцыяў», – тлумачыць Міла Котка.
Людміла Якоўчыц, намесніца дырэктара холдынгу «Гарызонт-Белінвест-Дэвэлапер», з якім дамаўляліся арганізатары «Vulica Brasil», паведаміла «Белсату», што кампанія ўжо не адказвае за рэкламныя плошчы па вуліцы Куйбышава.
«Хто адказвае цяпер – мы не ведаем», – сказала Якоўчыц па тэлефоне.
Інфармацыю аб цяперашніх уладальніках плошчы нам не прадставілі таксама на заводзе.
Па словах Мілы Коткі, на наступным тыдні, калі не будзе моцнага ветру, цягнік павінен з’явіцца таксама з другога боку галерэі.
«І будзе ўсё як і трэба – лятучае метро, – кажа Міла Котка. – Пакуль я жартую, што метро паляцела ў Чыкага – і хутка вернецца».
Сам аўтар арт-аб’екту прызнаецца, што глядзіць на здарэнне па-філасофску.
«[Рэклама] павісіць і здымуць, – кажа Андрэй Бусел. – У нас ніколі гладка не праходзіць нічога».
Банэр паверх цягніка мастак называе цяпер «лятучым манга».
ДД belsat.eu