Палата лордаў ухваліла перанос брэкзіту на 2020 год


Брытанская Палата лордаў 6 верасня прыняла закон, які прадпісвае прэм’ер-міністру прасіць Еўрапейскі Звяз аб новым адтэрмінаванні выхаду краіны з ЕЗ. Каб закон пачаў дзеяць, яго мае зацвердзіць каралева. Пра гэта паведамляе Бі-Бі-Сі.

Брытанскі парламент забараніў жорсткі Brexit

Зараз Вялікая Брытанія павінна выйсці з ЕЗ 31 кастрычніка, але закон загадвае прэмʼер-міністру прасіць аб адтэрміноўцы да 31 студзеня, калі прэм’ер не паспее дамовіцца пра новае пагадненне аб умовах выхаду.

Прэмʼер-міністр Барыс Джонсан адмаўляецца прасіць аб адтэрміноўцы, прапануючы замест гэтага правесці выбары. Але на датэрміновыя выбары не згодны парламент, дзе яго апаненты складаюць большасць.

На нарадзе ў пятніцу апазіцыйныя партыі дамовіліся 9 верасня галасаваць супраць або ўстрымацца пры галасаванні па прапанове прэмʼер-міністра правесці выбары 15 кастрычніка.

Брытанская каралева прыпыніла працу парламенту па просьбе Барыса Джонсана

Такім чынам, прапанова прэмʼера не мае шанцаў быць прынятай, бо для гэтага патрэбныя галасы большыя за дзве траціны спісачнага складу Палаты абшчын, а ў Джонсана няма ў парламенце нават простай большасці.

МГ belsat.eu

Глядзі таксама
Каментары