Прорва паміж рэйтынгам Уладзіміра Зяленскага ды Пятра Парашэнкі вырасла да 47 %. Сярод грамадзянаў Украіны, якія вызначыліся з выбарам і пойдуць на ўчасткі, 72,2 % прагаласуюць за лідара студыі «Квартал 95», а 25,4 % аддадуць галасы актуальнаму лідару дзяржавы. Такія дадзеныя сёння падаў Кіеўскі міжнародны інстытут сацыялогіі. Аднак пакуль кампаніі кандыдатаў у разгары, а іхныя прыхільнікі падзяліліся на непрымірымыя войскі, адмыслоўцы канстатуюць перавагу формы над зместам і намагаюцца зазірнуць за далягляд 21 красавіка, калі Украіна прыйдзе на ўчасткі.
У апошні тыдзень прэзідэнцкая гонка зрабілася яшчэ больш рэзкай і канвульсіўнай. Уздоўж дарог выраслі бігборды ў колерах кампаніі Парашэнкі з надпісам «Канец» і патыліцай кагосьці, падобнага да дзейнага кіраўніка дзяржавы, грамадскі транспарт ды слупы абраслі налепкамі «Порах сіла, кокс – магіла» ў колерах кампаніі Зяленскага (апаненты кандыдата-коміка абвінавачваюць яго ў злоўжыванні наркотыкамі). Парашэнка штодня запрашае Зяленскага да адкрытай дыскусіі – Зяленскі штодня не прыходзіць і раіць прэзідэнту займацца справамі.
Пасля першага туру тэлефон разрываецца ад паведамленняў новых сяброў. Тэлеграм-каналы Пятра Парашэнкі і каманды Уладзіміра Зяленскага навыперадкі заклікаюць падпісніка ісці на выбары, нягледзячы на кліматычнае вяртанне кастрычніка і патэнцыйную абыякавасць да палітыкі. Каманда Зе! запрашае далучацца да сваіх філіяў у самых розных гарадах Украіны, усталяваць адмысловы банер кандыдата на сваім персанальным сайце, інфармуюць пра выпадкі чорнага піяру, час ад часу тут з’яўляюцца свежыя сэлфі-прамовы Зяленскага, падазрона няўмелыя ды дрыготкія, як для буйнога медыя-бізнесоўца.
Каманда Зяленскага па-свойму рыхтуе кандыдата да дэбатаў 19 красавіка. Пытанні, якія комік мае задаць дзейнаму прэзідэнту, збіраюць на вуліцах украінскіх гарадоў. На гэтым відэа – жыхары Львова, дзе Зяленскі карыстаецца меншай падтрымкай, чым Парашэнка
Тэлеграм-канал Пятра Парашэнкі ўсяляк падкрэслівае моладзевую скіраванасць: кожны допіс пачынаецца са звароту «Дружа!» (аднойчы нават быў «гайз!», але, відавочна, потым у штабе вырашылі, што гэта занадта). Паведамленні кароткія, малюнкі яскравыя, прапановы інтэрактыўныя (яшчэ нядаўна ў галасаваннях былі дзве магчымыя рэакцыі: «лайк» або «сардэчка», але цяпер дазволілі паказваць нязгоду). Кожны тут – удзельнік адной стратэгічнай гульні з канкрэтнымі задачамі («Пераканай 3/5/10 сяброў галасаваць за Парашэнку– за курс на Еўразвяз ды NATO»).
Канал Парашэнкі прапануе спампоўваць набор стыкераў з выявай прэзідэнта ды фразамі-мемамі
Прорва паміж лагерамі прыхільнікаў абодвух кандыдатаў павялічваецца з кожным днём. Узаемныя абразы, сарказм і пераход на асобы сталі асаблівасцю дыскусіяў у грамадскім полі. Палітолаг і адмысловец Украінскага інстытуту будучыні, беларус Ігар Тышкевіч кажа, што за публікацыю нейтральнага аналізу апошнімі днямі пяць разоў сутыкнуўся з пагрозамі высылкі з Украіны.
«Пагрозы сыходзілі ад прыхільнікаў Пятра Парашэнкі, не бяруся сцвярджаць, што гэтыя людзі працуюць у ягоным штабе, – кажа спадар Ігар. – Прычым яны ёсць публічна, або ў фэйсбуку, або ў прыватных паведамленнях. Гэта верыфікуецца дастаткова лёгка. З іншага боку няма пагрозаў, але ёсць рэзкае незадавальненне».
Паводле Тышкевіча, тое, што адбываецца зараз, не нова, і Украіна праз гэта ўжо праходзіла:
«Калі паглядзець стылістыку кампаніі, яна ідзе не пра будучыню, не пра праграмы, а пра нянавісць да свайго апанента. Рэальную такую лютую нянавісць. З аднаго боку, гэта актывізуе ўласны электарат, з іншага – прымушае электарат апанента цябе ненавідзець. Гэты механізм быў запушчаны ва Украіне расейскімі паліттэхнолагамі перад 2004 годам. Ён вельмі жорсткі і цынічны, але ён даказаў сваю эфектыўнасць. На вялікі жаль, украінскія палітыкі кожны раз звяртаюцца да тых жа метадычак».
Тышкевіч кажа, што кожны з кандыдатаў у выпадку перамогі не будзе мець лаяльнай Вярхоўнай Рады. Апаненты новага прэзідэнта будуць распальваць недавер і нянавісць да яго.
«Ведаючы, як украінцы ставяцца да выканання законаў, можна ўявіць сабе, як будуць выконвацца законы, прынятыя ненавісным прэзідэнтам», – рэзюмуе Тышкевіч.
Якімі ж будуць гэтыя новыя законы? Ёсць пытанні да праграмаў абодвух кандыдатаў.
Паводле даследавання Міжнароднага цэнтру перспектыўных даследаванняў ды Украінскага інстытуту будучыні, перадвыбарчая праграма Уладзіміра Зяленскага ўяўляе сабой асобныя прапановы з розных сфераў грамадска-палітычнага жыцця. Пры гэтым усім пунктам не хапае сістэмнасці ды экстрапаляцыі на рэаліі ўкраінскай палітыкі. Да таго ж у экспертнай супольнасці няма ўяўлення, як сам кандыдат арыентуецца ва ўласнай праграме. І адмыслоўцы, і журналісты, і выбарцы, пакінутыя без канкрэтыкі, вымушаныя самі дадумваць, якімі будуць першыя планы Уладзіміра Зяленскага.
Няяснымі застаюцца кадравыя прызначэнні, пра якія каманда кандыдата абяцала загаварыць 19 красавіка, пытанні выклікае і гатовасць Зяленскага да супрацы з іншымі палітычнымі сіламі. Толькі праз факт перамогі Зе! ды яго каманды старыя палітыкі не знікнуць, а дзейны склад Вярхоўнай Рады будзе працаваць прынамсі паўгода, і Зяленскаму давядзецца супрацоўнічаць і шукаць кампрамісу.
Што да Парашэнкі, то да яго адкрытымі застаюцца пытанні датычна перадвыбарчых абяцанняў 2014 года, якія гэтак і не атрымалася выканаць. Правядзенне выбарчай рэформы, зняцце недатыкальнасці з дэпутатаў, прыняцце закону пра імпічмент – на ўсё гэта ў дзейнага прэзідэнта не хапіла пяці гадоў. Няўдалая перазагрузка судовай сістэмы, незавершаная антыкарупцыйная рэформа.
Апроч таго, прэтэнзіі выклікае чысціня вядзення перадвыбарнай агітацыі, маштабная кампанія дыскрэдытацыі Уладзіміра Зяленскага і тыражаваны штабам прэзідэнта мэсідж «Парашэнка або Пуцін».
Элітам і атачэнню Аляксандра Лукашэнкі, па словах Ігара Тышкевіча, Зяленскі не зручны. Не таму, што ён кепскі, а таму – што новы.
«Старыя эліты стварылі сістэму, якая існавала 20 год. Ты разумееш сістэму. Ведаеш, каму занесці і з кім дамовіцца. Незалежна ад змены ўлады. Цэнтры сілы ў рэальнай украінскай палітыцы знаходзяцца ў пэўных кабінетах. І ты маеш доступ, уваход у тыя кабінеты. А цяпер «опа!» – і гэтых цэнтраў няма. Гэта азначае, што твая частка эканамічных і іншых праграмаў, публічная, легальная, можа ісці далей. А іншая частка, тая, што на гэтак званых «карупцыйных дагаварняках», і якая можа раздражняць Расею, вось яна падвісае».
А значыць, з перамогай Зяленскага ўлады Беларусі стануць перад непазбежнай патрэбай пратоптваць новыя шляхі да новых украінскіх кабінетаў.
Адэля Дубавец, belsat.eu