Алімпіяда-2016 усяму свету запомнілася сваім сонцам, атмасферай карнавалу, яскравымі імпрэзамі. А таксама клопатамі: пуставатымі трыбунамі, бруднай вадой вакол Рыа-дэ-Жанэйра, дрэннымі ўмовамі жыцця спартоўцаў, пагрозай вірусу Зіка і скандалам вакол допінгу. А для беларусаў – найгоршым вынікам у камандным заліку за апошнія гады.
Агулам беларускія атлеты маюць 9 медалёў, з іх толькі адзін – залаты, заваяваны скакуном на батуце Уладзіславам Ганчаровым. Беларусь нечакана парадаваў і срэбраны кідальнік молата Іван Ціхан. Па чатыры срэбныя і бронзавыя медалі маем у цяжкай атлетыцы, плаванні, байдарках і ў вольнай барацьбе.
Беларускія алімпійцы мелі ўсё неабходнае і выступілі годна – лічаць у Нацыянальным алімпійскім камітэце. З Адміністрацыі Аляксандра Лукашэнкі ім ужо паведамілі, што вынік ухваляюць.
Але яшчэ гадоў 16 таму так мала медалёў Беларусь з Алімпіяды не прывозіла.
У Нацыянальным алімпійскім камітэце абяцаюць сурʼёзныя змены. У тым ліку знайсці прычыны сыходу атлетаў за мяжу, напрыклад, у Расею.
«Белсат», фота – Reuters