Казахстан і Беларусь не паспеюць падпісаць пагадненне пра пастаўкі казахскай нафты на беларускі рынак у кастрычніку. Пра гэта паведаміў 27 верасня віцэ-міністр энергетыкі Казахстану Эсет Магауаў, піша kursiv.kz.
Чыноўнік адзначыў, што ў цэлым тэкст пагаднення ўзгоднены паміж галіновымі міністэрствамі і кампаніяй «Белнафтахім», але застаецца шэраг пытанняў, адно з якіх датычыць гатовасці Менску ўзяць абавязак не дапусціць рээкспарт казахстанскіх вуглевадародаў у трэція краіны.
Узнікаюць пытанні рэалізацыі абавязку, бо Менск імпартуе і расейскія нафтапрадукты. Тым не менш, паводле віцэ-міністра, да канца году дамова мусіць быць падпісаная.
У сувязі з гэтым, працягнуў ён, у кастрычніку, калі запланаваны візіт у Нур-Султан Аляксандра Лукашэнкі, гэтае пагадненне падпісаць «будзе цяжкавата», бо бакі яшчэ не паспеюць прайсці ўнутрыдзяржаўнае ўзгадненне.
Канцэрн «Белнафтахім» разлічвае, што ў кастрычніку, падчас візіту ў Казахстан кіраўнік Беларусі Аляксандр Лукашэнка падпіша пагадненне з кіраўніцтвам гэтай краіны аб гандлі нафтай і нафтапрадуктамі.
Агулам Беларусь праявіла цікавасць да паставак нафты і нафтапрадуктаў з Казахстана ў абʼёме каля 3,5 мільёнаў тон за год.
МГ belsat.eu