12 студзеня жыхары Менску выйшлі нагадаць пра забойства Рамана Бандарэнкі, якое адбылося два месяцы таму, але супрацоўнікі сілавых структур перашкодзілі правядзенню акцыі памяці.
Менчукі з розных раёнаў хацелі сабрацца на плошчы Пераменаў, каб абысці з ліхтарыкамі трансфарматарную будку, на сцяне якой быў мурал дыджэяў Пераменаў. Аднак міліцыя не дала гэтага зрабіць, пачаліся затрыманні.
Валанцёры паведамляюць пра 12 затрыманых на дваровых акцыях.
Затрыманні таксама прайшлі ў гарадзенскім мікрараёне Вішнявец, схапілі як мінімум чатырох чалавек.
Пра затрыманні на плошчы Пераменаў выказалася Святлана Ціханоўская:
«Сёння – два месяцы з дня забойства Рамана Бандарэнкі. На Плошчы Пераменаў і ў іншых раёнах Менску затрымліваюць людзей, якія выйшлі ўшанаваць ягоную памяць.
У гэтага рэжыму няма павагі ні да жывых, ні да мёртвых. Лукашэнка кажа пра год народнага адзінства, але кожны дзень мы назіраем, як менавіта ён бачыць гэтае адзінства: з дубінкамі, судамі і 178 палітвязнямі. Ці трэба яшчэ нейкае пацверджанне таго, што гэты чалавек перастаў быць палітыкам і стаў вядомым на ўвесь свет злачынцам? Я лічу, няма».
ДР belsat.eu