Пад Менскам хочуць пабудаваць яшчэ адзін ядравы рэактар


Даследчы ядравы рэактар ​​можа пачаць працу да «сярэдзіне наступнага дзесяцігоддзя», яго плануецца размясціць у інстытуце энергетычных і ядравых даследаванняў «Сосны» ў 7 км ад Менска. Пра гэта паведамляе партал Саюзнай дзяржавы.

У «Соснах» пры падтрымцы НАН Беларусі і ў супрацы з дзяржкарпарацыяй «Расатам» плануецца будаўніцтва даследчага ядравага рэактара і Цэнтра ядравых даследаванняў.

«Ужо падпісаны адпаведны мемарандум аб намерах па супрацы паміж урадамі Расеі і Беларусі. Так што, калі ўсё пойдзе паспяхова, у сярэдзіне наступнага дзесяцігоддзя ў Рэспубліцы будзе ўжо тры ядравых рэактара, два з якіх будуць падтрымліваць яе эканоміку, а адзін – навуку», – адзначае партал Саюзнай дзяржавы.

Пра тое, што ў Беларусі можа зʼявіцца даследчы ядравы рэактар ​​паведамлялася і раней.

«За апошнія гады НАН Беларусі неаднаразова звярталася ў зацікаўленыя міністэрствы і ведамствы краіны з запытам аб мэтазгоднасці будаўніцтва і магчымых напрамках выкарыстання даследчага рэактара. Былі атрыманы станоўчыя адказы, якія дазволілі сфармаваць папярэдні пералік напрамкаў выкарыстання», – заяўляў у 2016 годзе дырэктар інстытуту «Сосны» Андрэй Кузьмін.

Рэактар ​​можа выкарыстоўвацца для фізічных даследаванняў, у радыяцыйным матэрыялазнаўстве, для навучання і падрыхтоўкі кадраў.

ІІ, belsat.eu

Стужка навінаў