Пад Асіповічамі затрымалі ды збілі анархіста Дзядка. Яго тэлеграм-канал захапілі
Затрыманы адзін з лідараў анархісцкага руху Беларусі Мікола Дзядок, паведамляе тэлеграм-канал МУС Беларусі.
Падазрэнні пра затрыманне актывіста з’явіліся пасля таго, як у ягоным тэлеграм-канале з’явілася інфармацыя з крытыкай пратэсту і пратэстоўцаў. Пасля гэтага пацвердзілі і ў МУС, заявіўшы, што «супрацоўнікі ГУБАЗіК МУС затрымалі 32-гадовага менчука Мікалая Дзядка, які на працягу некалькіх гадоў адміністраваў радыкальны тэлеграм-канал «Мiкоlа», дзе публічна заклікаў да ўдзелу ў масавых беспарадках і сілавых акцыях «прамога» дзеяння».
Як заяўляецца, актывіст хаваўся ў канспіратыўнай кватэры ў пасёлку Сасновы Асіповіцкага раёну. Адзначаецца, што там знайшлі замежныя банкаўскія аплатныя карткі і буйныя сумы грошай у рознай валюце, кактэйлі Молатава, улёткі, налепкі, пратэставую атрыбутыку і камп’ютарную тэхніку.
«Фігурант актыўна супрацоўнічае са следчымі органамі і дае прызнальныя паказанні», – заяўляюць у МУС.
На апублікаваных відэакадрах бачна, што Мікола Дзядок моцна збіты.
- Мікола Дзядок нарадзіўся ў 1988 годзе. Быў арыштаваны 3 верасня 2010 года паводле справы аб «нападзе на амбасаду Расейскай Федэрацыі» у ноч на 31 жніўня ў Менску. 27 мая 2011 года яго асудзілі на 4,5 гады пазбаўлення волі ў калоніі ўзмоцненага рэжыму. Быў прызнаны палітвязнем.
- За пяць дзён да сканчэння тэрміну 26 лютага 2015 года суд Ленінскага раёну Магілёва асудзіў палітвязня паводле артыкула 411 Крымінальнага кодэкса «злоснае непадпарадкаванне патрабаванням адміністрацыі» да 1 года зняволення ў калоніі строгага рэжыму. Быў памілаваны 22 жніўня 2015 года.
- Пасля неаднаразова затрымліваўся паводле адміністратыўных артыкулаў.
МГ belsat.eu
