Акцыю зладзіла «Арт Сядзіба». Звычайныя пасажыры маглі паслухаць расказы пра цікавыя мясціны сталіцы і пачуць спевы Андруся Такінданга.
У суботу, 16 лютага, па Менску праехаўся чарговы трамвайчык для закаханых. І калі 14 лютага ў першым з іх можна было паслухаць лідара гурта :B:N: Алеся Лютыча, то сённяшні быў напоўнены спевамі Андруся Такінданга і расказамі пра цікавыя мясціны сталіцы ад Івана Сацукевіча.
Трамвайчык стартаваў ад станцыі метро Трактарны завод, праехаўся да дыспетчарскіх станцыяў Зялёны Луг і Возера і завяршыў свой маршрут на праспекце Незалежнасці.
Да арганізацыі акцыі спрычыніліся актывісты «Арт Сядзібы». І за галоўную мэту яны ўзялі паказаць Менск у незвычайным ракурсе з вокнаў звычайнага грамадскага транспарту, да ўсяго яшчэ і з рэальным музычным суправаджэннем.
Арганізатары абяцаюць, што гэта не апошняя імпрэза ў такім фармаце, і трэба сачыць за абвесткамі ў сацыяльных сетках. Праўда, і ператвараць акцыі ў нешта звыклае «Арт Сядзіба» не збіраецца.
Марыя Арцыбашава, фота аўтара/Belsat.eu
