П’яная жыхарка Чачэрскага раёну разграміла кавярню, чужое аўта і падʼезд. Ёй прымроіўся былы хлопец


28-гадовая дзяўчына нападпітку вярталася дадому і ў пэўны момант ёй падалося, што наперадзе ідзе ейны былы хлопец. Маладзён нібыта зайшоў у пусты будынак былой кавярні, дзяўчына пайшла «за ім».

Пераадолеўшы агароджу, яна разбіла вокны і пралезла ўсярэдзіну, перавярнула стол. Пазней у адным з двароў ёй падалося, што былы прыпаркаваў сваё аўта. Буянка вырвала дзвярныя ручкі, зламала антэну, а забраўшыся ў салон, пашкодзіла прыборную панэль і сарвала люстэрка задняга віду, праз што трэснула лабавое шкло.

На гэтым яна не спынілася. Дастаўшы з багажніка дызельнае паліва і маторны алей, дзяўчына выліла рэчыва на асфальт, пасля чаго пайшла шукаць экс-бойфрэнда ў адную з кватэраў бліжэйшага дому.

У пад’ездзе яна паспрабавала вырваць паштовую скрыню, сарвала дзвярны званок і грукала ў першыя дзверы, на якія натрапіла. Гаспадыня выклікала міліцыю.

У судзе дзяўчына прасіла прабачыць яе і раскаялася. Шкоду сплаціла, віну цалкам прызнала. Ёй прысудзілі адзін год папраўчых працаў паведамляе checherskivestnik.by.

ДР belsat.eu

Глядзі таксама
Каментары