Тэлеканал ОНТ 13 ліпеня апублікаваў новы сюжэт пра «справы Белгазпрамбанку» і яго былога кіраўніка, а зараз патэнцыйнага кандыдата ў прэзідэнты Віктара Бабарыку.
Паводле дзяржаўнага медыя, у цэнтральным офісе «Белгазпрамбанку» ў Менску доўгі час працавала «чорная каса», з дапамогай якой кіраўніцтва банку праводзіла закрытыя аперацыі. Як распавёў намеснік начальніка ўпраўлення дэпартаменту фінансавых расследаванняў КДК Дзмітрый Дзягілеў, яе стварылі на загад Віктара Бабарыкі.
Працу «чорнай касы» нібы каардынавалі Андрэй Грыгаровіч, які адказваў у банку за раздробны бізнес, і намеснік старшыні банку Сяргей Дабролёт, якія нібыта мусілі адмыць «брудныя грошы» праз набыццё банкаўскіх аблігацыяў на прад’яўніка.
Як распавёў начальнік упраўлення дэпартамента фінансавых расследаванняў КДК Юрый Мяхедаў, 2 красавіка 2020 года на пасяджэнні праўлення банку на загад Бабарыкі было прынятае рашэнне аб выплаце прэміяў топ-менеджарам банку. Агульная сума такіх узнагарод склала каля 5 млн рублёў. 4 красавіка ў закрытых для іншых кліентаў касах з 11.00 да 12.35 быў штучна зніжаны курс замежнай валюты, дзякуючы чаму працаўнікі банку, якія атрымалі прэміі, набылі паводле заніжанага курсу замежную валюту на суму больш за $ 1 млн.
9 ліпеня дзяржаўны тэлеканал ОНТ паказаў вялікі матэрыял пра «справу Белгазпрамбанку», дзе сцвярджаецца, што абвінавачаныя «актыўна супрацоўнічаюць са следствам». У межах справы затрыманыя больш за 20 чалавек. Паводле ОНТ, у аснову абвінавачвання ляглі бізнес-схемы, звязаныя з кампаніяй «ПрыватЛізінг».
Адвакат затрыманага патэнцыйнага прэтэндэнта на прэзідэнта Дзмітрый Лаеўскі лічыць, што ў следства няма дакладных доказаў віны Віктара Бабарыкі. Нягледзячы на тое, што ў «спецрасследаванні» на АНТ прагучала, што нібыта «фігуранты справы супрацоўнічаюць са следствам», адвакат лічыць, што факт з’яўлення фільма сведчыць пра адсутнасць дастатковых доказаў па справе.
Тэлеканал «Беларусь 1» увечары 12 ліпеня прадэманстраваў фільм «Назад у 90-я? Трэст, які лопнуў». У стужцы распавядаецца, што «Белгазпрамбанк» нібыта на ўсёй краіне захопліваў прыватныя бізнесы, якія не маглі выплаціць крэдыты.
МГ belsat.eu