ОНТ: экс-кіраўнік «Белгазпрамбанку» Кірыл Бадзей дае паказанні супраць Віктара Бабарыкі

Дзяржаўны тэлеканал ОНТ паказаў вялікі матэрыял пра «справу Белгазпрамбанку», дзе сцвярджаецца, што абвінавачаныя «актыўна супрацоўнічаюць са следствам». У межах справы затрыманыя больш за 20 чалавек.

Паводле ОНТ, у аснову абвінавачвання ляглі бізнес-схемы, звязаныя з кампаніяй «ПрыватЛізінг».

«Калі каротка, то сутнасць гэтага бізнесу заключалася ў наступным. «ПрыватЛізінг» рэалізоўваў насельніцтву тавары ў растэрміноўку або лізінг і разлічваўся з прадаўцом за гэтыя тавары за кошт крэдытных рэсурсаў банка. Такім чынам паспяховасць вядзення бізнесу наўпрост залежала ад умоў крэдытавання іх банкам», – заявіў ОНТ начальнік аддзелу Следчага ўпраўлення КДБ Канстанцін Бычак.

Вочная стаўка з удзелам Бабарыкі. Скрыншот з эфіру ОНТ

Па словах чэкіста, «кіраўніцтвам банку, у тым ліку старшынёй праўлення Віктарам Бабарыкам, прадпрымальнікам было пастаўлена ўмова – за спрыяльнае вырашэнне пытанняў аб крэдытаванні іх кампаніі на выгадных умовах яны павінны былі прадастаўляць частку прыбытку ў выглядзе так званага «адкату».

Бычак кажа, што на імя юрыста банку, а таксама працаўніка банку і па сумяшчальніцтве блізкага сябра Бабарыка быў зарэгістраваны шэраг замежных фірмаў, якія ўвайшлі ў склад заснавальнікаў «ПрыватЛізінгу». «Адначасова з гэтым у афшорных юрысдыкцыях для Бабарыкі і астатніх удзельнікаў злачыннай групы былі адкрытыя так званыя фірмы-гаманцы, на якіх акумулявалася незаконнае грашовае ўзнагароджанне», – заявіў Бычак.

Віктар Бабарыка на допыце. Скрыншот ОНТ

ОНТ паказала кадры вочнай стаўкі Віктара Бабарыкі і выконваючага абавязкі старшыні праўлення Белгазпрамбанка Кірыла Бадзея (ён заняў гэтую пасаду пасля адстаўкі Бабарыка, а раней быў ягоным намеснікам). Тэлеканал адзначае, што Бадзей дае «прызнальныя паказанні»: ён сцвярджае, што гэта нібыта Бабарыка кіраваў «атрыманнем незаконных грашовых узнагарод ад «ПрыватЛізінгу». Быццам бы ў 2019 Бабарыка атрымаў ад свайго намесніка $ 350 000.

«Апошняя сума, якая была ўжо вясной 2020 года (Віктар Дзмітрыевіч пакідаў банк), ён даручыў самастойна перадаць гэтыя грашовыя сродкі іншым калегам. Грошы я аддаваў Ільясюк, Кузьмічу і Шабану. Гэта была не мая ініцыятыва. Мне яе агучыў Віктар Дзмітрыевіч [Бабарыка]. Грашовыя сродкі перадаваліся, як разумею, за супрацу з названымі кампаніямі. Паміж банкам і кампаніямі», – казаў падчас вочнай стаўкі Бадзей.

Паводле прадстаўніка КДБ, «следства мае неабвержныя доказы датычнасці ўсіх фігурантаў крымінальнай справы да інкрымінаваных ім злачынствах».

Падпалкоўнік, былы памежнік, вучыўся ў Акадэміі ФСБ. Што вядома пра палітвязня Дзмітрыя Караку

  • Віктар Бабарыка і ягоны сын Эдуард былі затрыманыя 18 чэрвеня ў межах «справы Белгазпрамбанку», яны цяпер знаходзяцца ў СІЗА КДБ. Віктару Бабарыка выстаўлена абвінавачванне паводле ч. 2 арт. 235 («адмыванне» сродкаў, атрыманых злачынным шляхам), ч. 2. арт. 243 (ухіленне ад выплаты падаткаў, якое пацягнула шкоду ў асабліва буйным памеры) і ч. 2 арт. 431 (дача хабару паўторна ў асабліва буйным памеры) КК Беларусі. Эдуарда Бабарыку вінавацяць паводле ч. 2 арт. 243 КК (ухіленне ад выплаты падаткаў у асабліва буйным памеры).
  • За шэсць дзён да затрымання Аляксандр Лукашэнка заявіў, што Віктара Бабарыка датычны да злачыннай дзейнасці топ-менеджараў «Белгазпрамбанку». Адначасова старшыня КДК Іван Тэртэль распавёў, што «фактычна на базе банку імі была створана арганізаваная злачынная група, якая ажыццяўляла вывад грашовых сродкаў на тэрыторыі замежных дзяржаваў». У адказ на пытанне журналістаў, ці датычны да гэтага Віктар Бабарыка, Тэртэль адзначыў: «Не магу сабе ўявіць, што тое, што рабілася ў банку намеснікамі, магло быць невядома кіраўніку. Магу пацвердзіць, што ў цяперашні час у нас маюцца пераканаўчыя доказы яго датычнасці да дадзенай супрацьпраўнай дзейнасці». На той момант ніякага працэсуальнага статуса ў гэтай справе Бабарыка яшчэ не меў.
  • Міжнародная праваабарончая арганізацыя Amnesty International прызнала Віктара Бабарыку і ягонага сына Эдуарда вязнямі сумлення. Беларуская праваабарончая супольнасць таксама прызнала палітвязнямі фігурантаў «справы Белгазпрамбанку» Святлану Купрэеву, Дзмітрыя Караку, Алену Карагачову і Уладзіміра Дударава.

Творчая інтэлігенцыя за Віктара Бабарыку

ІІ belsat.eu

Hавiны