Аляксандр Лукашэнка прызначыў міністрам унутраных справаў Юрыя Караева. Да апошняга часу сілавік працаваў на пасадзе намесніка міністра ўнутраных справаў – камандзіра ўнутранымі войскамі МУС РБ.
Традыцыйна міністрам унутраных справаў стаў ураджэнец не Беларусі, а адной з краінаў былога СССР. Юры Хаджымуратавіч Караеў нарадзіўся 21 чэрвеня 1966 году ў сталіцы Паўночнай Асеціі горадзе Арджанікідзэ (цяпер Уладзікаўказ).
Юры Караеў скончыў Саратаўскі вайсковы інстытут унутраных войскаў МУС РФ у 1987 годзе. У 1996 годзе ён скончыў Акадэмію генштабу імені Фрунзе.
Да пераводу ў Менск Караеў узначальваў вайсковую частку 5527 у Бабруйску, потым 5525 у Гомлі. Гэтыя часткі з’яўляюцца міліцэйскімі батальёнам і брыгадай.
З 2008 году Юрый Хаджымуратавіч стаў пераемнікам Падабеда на пасадзе камандзіра Менскага спецназу, але праз тры месяцы пасля гэтага прызначэння яго пераводзяць у частку 3214 ва Уруччы, якую раней узначальваў Паўлючэнка. Тут Юрый Караеў пазнаёміўся і з былым кіраўніком службы аховы Лукашэнкі Андрэем Уцюрыным, які цяпер за кратамі.
У 2009 годзе Караеў заняў пасаду першага намесніка начальніка аператыўнай і баявой падрыхтоўкі ўнутраных войскаў МУС Беларусі. А ў снежні 2012 году стаў кіраваць унутранымі войскамі.
Юрый Караеў часта дзяжурыў на так званых «наўпроставых лініях», якія ладзіць МУС. Каментаваў і вострыя тэмы.
У сілавых колах адзначаецца, што з Ігарам Шуневічам Караеў меў сяброўскія адносіны.
СК belsat.eu