Міжнародная кампанія за забарону ядравай зброі (ICAN) атрымала Нобелеўскую прэмію міру 2017-га году. Лаўрэата абвесцілі сёння ў Осла, Нарвегія а 11-й гадзіне па цэнтральнаеўрапейскім часе.
«Арганізацыя атрымлівае ўзнагароду за прыцягненне ўвагі да катастрафічных гуманітарных наступстваў пры любым выкарыстанні ядравай зброі, а таксама за іх інавацыйныя намаганні дасягнуць афіцыйных дамоўленасцяў аб забароне гэтых узбраенняў», – сказана ў афіцыйным паведамленні Нобелеўскага камітэту.
ICAN зʼяўляецца абʼяднаннем няўрадавых арганізацыяў з больш, чым 100 краінаў свету. Яны зʼяўляюцца найбольш уплывовым грамадскім чыннікам, які схіляе краіны да перамоваў аб абмежаванні, раззбраенні і стыгматызацыі ядравай зброі. На сённяшні дзень, 108 дзяржаў узялі на сябе падобныя абавязкі.
Кампанія ICAN пачала сваё існаванне ў 2007 годзе.
Выбар Нобелеўскага камітэту выглядае, як папрок 9 краінам, якія валодаюць ядравай зброяй. Сярод іх – ЗША, Кітай, Расея. У ліпені 2017-га году яны праігнаравалі перамовы ААН аб пагадненні наконт забароны выкарыстання ядравай зброі.
Нобелеўскі камітэт у сваім паведамленні падкрэсліў:
«У наступныя крокі павінны ўключыцца ядравыя дзяржавы. У гэтым годзе Прэмія міру – гэта заклік гэтым дзяржавам распачаць сурʼёзныя перамовы з перспектывай паступова, збалансавана і пад наглядам знішчыць амаль 15 000 адзінак ядравай зброі, што зараз ёсць у свеце»
Учора стала вядома імя Нобелеўскага лаўрэта па літаратуры гэтага году. Ім стаў брытанскі пісьменнік японскага паходжання Кадзуо Ісігуро.
ВЧ, belsat.eu
