Жыхар Берасцейшчыны Аляксандр Кабанаў, сваяку якога тэрмінова неабходна прайсці МРТ (магнітна-рэзанансную тамаграфію), паспрабаваў запісаць свайго сваяка да лекараў. Але аказалася, што гэта не так і проста, піша блогер NEXTA.
«Аказалася, што ў абласным цэнтры, дзе пражывае 344 тысячаў чалавек няма ніводнага спраўнага апарата. А на тыя, што ёсць (платныя) – чарга… на кастрычнік! Не працуе апарат і ў шпіталі ў Баранавічах. Калі будзе адрамантуюць – невядома. Грошай няма. МРТ ж – не кабінет прэм’ера», – паведамляе блогер.
У галоўным ўпраўленні па ахове здароўя Берасцейскага аблвыканкаму адзначаюць, што медычная дапамога будзе аказана кожнаму, хто звяртаецца да медыкаў, у залежнасці ад таго, ці гэта экстранны зварот, ці планавая дапамога.
«Для таго, каб запісацца на абследаванне – неабходна звяртацца да ўчастковага тэрапеўта па месцы жыхарства. У экстранным выпадку дапамога будзе аказана неадкладна. А вось планавая дапамога будзе аказана ў планавым парадку. Таму тут няма аніякіх праблемаў», – распавёў «Белсату» Андрэй Карнялюк, першы намеснік начальніка ўпраўлення па ахове здароўя Берасцейскага аблвыканкаму.
Што да рамонту апаратаў, якія цяпер не працуюць, у аблвыканкаме абяцаюць вырашыць праблему ў бліжэйшы час.
«Так, на самой справе ў нас выйшаў з строю апарат. Але на сёння мы маем усё неабходнае для яго рамонту, таму ў кароткія тэрміны няспраўнасць будзе ліквідавана», – дадаў Андрэй Карнялюк.
СК belsat.eu
