Правакатары, якія кідаліся яйкамі
Пад канец шэсця, прысвечанага Дню Незалежнасці, невядомыя пачалі кідацца яйкамі, пасля чаго ўцяклі.
Даганяць іх пабеглі некалькі ўдзельнікаў акцыі, а таксама двое міліцыянтаў, незадаволеных такім паваротам справы. Пра гэта паведамляе «Наша Ніва».
Правакатары, меркавана, прыстроіліся да калоны каля Палаца Прафсаюзаў. Ужо тады яны падаліся некаторым падазронымі, бо ў цёплы жнівеньскі вечар усе чацвёра былі апранутыя ў курткі з каптурамі.
Пагоня працягвалася да праспекту Дзяржынскага. Адзін з міліцыянтаў пазычыў у нейкага мінака ровар і паехаў у паказаным кірунку, куды, меркавана, звярнулі двое правакатараў.
Паводле звестак аднаго з журналістаў, адзін з назіральнікаў праваабарончага цэнтру «Вясна» меў з сабой ровар і таксама паехаў даганяць правакатараў. З яго слоў, усе яны ўскочылі ў нейкі сіні бус, які стаяў побач з будынкам універсітэту.
На пытанне журналістаў, чаму не спрацавала ачапленне, міліцыянты сказалі, што «расслабіліся», бо акцыя ўжо скончылася, а асноўная ўвага да таго, што адбываецца, была падчас шэсця. На пытанне, ці была перад акцыяй у міліцыі інфармацыя пра магчымыя правакацыі, яны адказалі, што не было, і калі б яны нешта ведалі, то не дапусцілі б такога.
Паводле звестак сведкаў, камандзір менскага АМАПу Балаба разʼюшаны. Калі адзін з удзельнікаў акцыі спытаў яго, ці будуць лавіць правакатараў, той па-беларуску адказаў: «Ты што, не бачыш?»