Невядомы труціць сабак у Менску. Ветэрынары раяць выгульваць гадаванцаў у намордніках

Пра выпадак атручвання ў Facebook напісала жыхарка Менску Алена Юрычава. Цяпер яна прыкладае намаганні, каб іншыя сабакі не трапілі ў пастку злодзея.

Паводле дзяўчыны, кавалкі лівернай каўбасы з пігулкамі ад сухотаў, якія выдаюцца паводле рэцэпту, невядомы раскідаў у раёне вуліцаў Крапоткіна і Харужай. Дзяўчына піша, што за апошнія содні пацярпелі чатыры сабакі.

Міліцыя паведаміла, што зарэгістраваны толькі адзін выпадак.

«Сімптомы аднолькавыя. Пасля прагулкі падаюць, пена з роту і ўсё», – піша Алена Юрычава.

Калі не аказаць першую дапамогу, у сабакі пачынаюцца сутаргі, спыняецца дыханне, а пасля сэрца.

Сабака Алены пад кропельніцай, але жывы. Трох гадаванцаў выратаваць не змаглі.

Ветэрынары кажуць, што ў такіх выпадках дапамагчы жывёлінам у хатніх умовах вельмі цяжка, трэба весці ў шпіталь. Спецыялісты распавядаюць, што такія выпадкі фіксуюцца па ўсім горадзе і не ўпершыню. Летась пра падобныя выпадкі атручвання пісаў партал Animal.by.

Ветэрынары раяць выгульваць сабак толькі ў намордніку і трэнаваць не есці з зямлі.

За жорсткае абыходжанне з чатырохногім у Беларусі прадугледжана адміністрацыйная адказнасць у выглядзе штрафу і крымінальная – да 1 года пазбаўлення волі.

ДР belsat.eu