Некаторыя злачынствы ў Беларусі могуць дэкрыміналізаваць

Генеральная пракуратура Беларусі зоймецца магчымасцю дэкрыміналізацыі часткі крымінальна-прававых складаў. Пра гэта ў эфіры тэлеканалу АНТ паведаміла намесніца кіраўніка Адміністрацыі прэзідэнта Вольга Чупрыс.

На думку чыноўніцы, якая ўзначальвае міжведамасную камісію для карэктавання КаАП, частка артыкулаў Крымінальнага кодэксу магла перайсці ў разрад адміністрацыйных правінаў.

«Калі такую магчымасць Генпракуратура прадугледзіць, гэта будзе нядрэнна», – сказала Вольга Чупрыс.

https://belsat.eu/news/tsi-patrebnaya-belarusi-dekryminalizatsyya-narkotykau/

Яна таксама распавяла, што адносна абнаўленняў у Кодэкс аб адміністрацыйных правапарушэннях ад грамадзянаў ужо паступіла каля 1,5 тыс. пажаданняў і прапаноў. Шэраг з іх – фармулёўкі канкрэтных нормаў.

«У шэрагу выпадкаў прапануюцца нават больш моцны ціск, чым прадугледжаныя цяпер», – адзначыла Вольга Чупрыс.

Сам абноўлены кодэкс плануецца падрыхтаваць да 1 чэрвеня. У ім, сярод іншага, мае быць раздзел, які замест адміністрацыйнай адказнасцю прадугледжвае прафілактычную размову, вусную заўвагу або вуснае папярэджанне. За некаторыя парушэнні адказнасць плануецца прадугледзець толькі, калі яны здзяйсняюць паўторна.

https://belsat.eu/news/kaap-refarmuyuts-skladanne-administratyunyh-pratakolau-dzelya-vykanannya-plana-stane-nedapushchalnym/

Грамадзяне Беларусі могуць высылаць свае пажаданні і прапановы па зменах у КаАП да 24 студзеня.

МГ belsat.eu

Hавiны