Падчас святочнага салюту 3 ліпеня ў Менску снарады разрываліся блізка да зямлі не толькі на пляцоўцы, усталяванай на Камсамольскім возеры.
Як паведамляе Telegram-канал «Nexta», «у ваенным гарадку Уручча таксама запускалі феерверкі, адзін з якіх выбухнуў, не адрываючыся ад зямлі, прыкладна на 3-й або 4-й хвіліне».
Гледачоў ад аскепкаў выратавалі боксы, якія знаходзіліся на тэрыторыі вайсковай часткі паміж імі і салютнай устаноўкай.
Пасля гэтага вайскоўцы, якія адказвалі за запуск салюту ва Уруччы, адразу ж яго спынілі.
Паводле інфармацыі «Nexta», прычынай выбухаў салюту маглі стаць зарады. Беларускія ваенныя куплялі іх у расейскай кампаніі ААТ «Пиро-Росс». Зробленыя зарады былі ў Кітаі.
Нагадаем, што ў Менску падчас салюту на Дзень Незалежнасці адбылося надзвычайнае здарэнне. У выніку разрыву салюту загінула жанчына 1955 года нараджэння, якая назірала за відовішчам на беразе ракі Свіслач.
МГ belsat.eu