Цягам першых чатырох месяцаў ВУП Беларусі ўпаў у параўнанні з адпаведным перыядам 2019 года. Пры гэтым моцна абваліліся паказнікі ў шмат якіх галінах, у той час як рост паказваюць толькі некаторыя з іх.
Паводле Белстату, валавы ўнутраны прадукт за студзень – красавік 2020 года ў бягучых цэнах склаў Br 41,1 млрд, або ў супастаўных цэнах 98,7 % да ўзроўню студзеня – красавіка 2019 года.
Пры гэтым аб’ём прамысловай вытворчасці склаў 96,2 %:
- у горназдабыўчай прамысловасці – 97,8 %,
- апрацоўчай прамысловасці – 96 %,
- забеспячэнні электраэнергіяй, газам, парай, гарачай вадой і кандыцыянаваным паветрам – 96,3 %,
- водазабеспячэнні; зборы, апрацоўцы і выдаленні адходаў, ліквідацыі забруджванняў – 101,5 %.
Арганізацыі ды ІП перавезлі 89,9 % грузаў адносна студзеня–красавіка 2019 года. Грузаабарот склаў 88,9 %.
Loading…
Паслугамі пасажырскага транспарту ў першыя чатыры месяцы скарысталіся ў памеры 89,3 % да адпаведнага перыяду летась. Пасажыраабарот склаў агулам 85,6 %:
- на чыгуначным транспарце – 71,3 %,
- аўтобусным – 91,5 %,
- паветраным – 89,7 %,
- гарадскім электрычным і метрапалітэне – 86,4 %.
Але ў будаўнічай галіне аб’ём падрадных працаў вырас на 20 %, уведзенага ў эксплуатацыю жылля – на 6,1 %.
Вытворчасць прадукцыі сельскай гаспадаркі склала ў параўнанні са студзенем – красавіком 2019 года ў супастаўных цэнах 105,2 %:
- Вырашчана жывёлы і птушкі (у жывой вазе) 105 %,
- Выраблена малака 105,2 %.
Аптовы тавараабарот склаў у супастаўных цэнах 89,7 %, а вось раздробны – 104,7 %, у тым ліку:
- арганізацыяў гандлю – 106,3 %,
- грамадскага харчавання – 88,8 %.
Вінаватыя каронавірус і стасункі з Расеяй
У каментары belsat.eu старэйшы аналітык «Alpari» Вадзім Іосуб патлумачыў падзенне адразу ў некалькіх галінах эканомікі наступствамі эпідэміі каронавіруса і крызісам у стасунках Беларусі ды Расеі.
«Вынік першых двух месяцаў года быў звязаны з адсутнасцю паставак нафты з Расеі. Гэта, відавочна, спрычынілася да змяншэння аб’ёму нафтаперапрацоўкі, транспартавання нафтапрадуктаў па трубапровадах – гэта адносіцца да транспартнай галіны і да змяншэння аптовага продажу нафтапрадуктаў», – адзначыў эканаміст.
Пасля да гэтага дадалася яшчэ і пандэмія каронавіруса.
«Людзі сталі пазбягаць наведвання розных установаў грамадскага харчавання. Людзі рэзка зменшылі карыстанне любымі паслугамі. Нават сталі менш купляць, апроч прадуктаў харчавання і тавараў першай неабходнасці. Адпаведна не патанулі толькі галіны, ніяк не звязаныя з вірусам», – мяркуе Вадзім Іосуб.
Гэтак, у адсутнасць каранціну працягвалася будаўніцтва. Сельская гаспадарка расце, бо людзі «працягваюць есці» і, магчыма, захоўваецца экспарт аграрных прадуктаў. Не ўпала таксама і тое, што адносіцца да інфарматыкі ды сувязі, падкрэсліў эканаміст. Усё астатняе скарацілася, дадаў ён.
МГ belsat.eu
