Сёння ў Маскоўскім і Фрунзенскім раёнах сталіцы пачаліся праблемы з пітною вадою. Жыхары наракалі на рэзкі пах і пякоту. Хутка быў арганізаваны падвоз вады ў цыстэрнах. Але іх не хапала, таму людзі пачалі самастойна дапамагаць адно аднаму.
Ужо праз пару гадзінаў, як сталі вядомымі праблемы з вадою, у Telgram з’явіўся чат «Взаимопомощь с водой Минск». Прынцып працы просты: каму вада зараз патрэбная – піша аб гэтым, і на заклік адгукнуцца той, хто можа неяк дапамагчы. Даць чыстую ваду, прывезці купленую з крамы або нават пусціць у душ.
Стваральнік чату Уладзімір прыдумаў такую ідэю, калі не здолеў вымыць рукі ў гасцях. Потым даведаўся, што знаёмыя заграслі без вады, а сваякі прыязджалі да яго выкупаць немаўлятка.
Ён пабачыў праблему і ацаніў магчымыя сцэнары развіцця падзеяў. Уладзімір мае ваду з уласнай свідравіны, якой мог падзяліцца. Для «воднага краудфандынгу» вырашыў выкарыстаць Telegram.
«Падаецца, карыстальнікі асабліва ўжо і не спадзяюцца на аператыўную дапамогу дзяржавы. Большасць асэнсоўвае, што праблемы грамадзянаў з вадою – гэта адна рэчаіснасць, а прыймальная якасць вады ў сюжэце – паралельная», – кажа ён.
Таксама дапамогу прапаноўваюць у чаце «Hackerspace», і ў чаце «Минск 97%».
Настасся Казімірка-Кірылава нарадзілася ў Маскве, а жыве ў Менску ўсяго 3 месяцы.
«Але калі ў горадзе катастрофа, а ў мяне пад бокам вялікая крама, то я не магу заставацца ў баку. У нас у раёне была падобная аварыя ў 2005 годзе», – прыгадвае дзяўчына.
Яна набыла некалькі дзясяткаў пяцілітровых бутэлек з вадою. Кажа, што ў крамах ваду размятаюць на вачах. Амаль усе людзі на касе закупаюцца вадой.
Жыхарка Менску Ірына таксама вызвалася дапамагчы з вадою ахвотным. Яна кажа, што людзі баяліся браць ваду.
«А вы проста так прывезлі, адкуль яна, гэта бяспечна? Колькі мы вам вінныя? Вазьміце пустыя бутлі наўзамен!», – смяецца яна.
А тым часам менчукі выстройваюцца ў вялізныя чэргі па ваду.
І за некаторымі з іх пільна сочаць з сініх бусаў міліцыянты з рацыямі.
Сёння ў шматлікіх раёнах Менску жыхары пачалі наракаць на якасць вады. Прадстаўнікі Менгарвыканкаму заявілі, што аніякіх шкодных рэчываў не было знойдзена, а ўсе праблемы са смуродам – за высокай тэмпературы.’
Усе праблемы абяцалі выправіць да заўтрашняга дня. Таксама ўлады абяцалі зрабіць пераразлік жыхарам найбольш праблемных раёнаў.
КТ belsat.eu