«Не дапусціць дэкласаваныя элементы». Ярмошына прапанавала зрабіць платным удзел у выбарах

Старшыня ЦВК Лідзія Ярмошына падчас выступу перад актывам БРСМ у Менску прапанавала ў будучыні кандыдатам на пасаду прэзідэнта ствараць фінансавыя фонды для ўдзелу ў выбарах, перадаюць «Минск-Новости».

Адказваючы на ​​пытанне аб неабходнасці змяненняў выбарчага заканадаўства, Ярмошына адзначыла, што грашовыя ўнёскі пацвердзілі б «сур’ёзнасць намераў» кандыдатаў. Паводле яе, у краіне «дайшлі да таго, што ўдзельнічаць у выбарах могуць беспрацоўныя, людзі без адукацыі, якія вядуць незразумелы лад жыцця».

«Калі б цэнтральная камісія з заўзятасцю не правярала заявы аб рэгістрацыі ініцыятыўных груп, іхных удзельнікаў, то ўдзельнічаць у выбарах маглі б 55 патэнцыйных кандыдатаў, якім патрэбна была толькі пляцоўка для мітынгу. Мы выпусцілі 15 правераных ініцыятыўных груп. З іх падалі дакументы аб зборы подпісаў сем чалавек. Атрымліваецца, восем выкарыстоўвалі гэта для самарэкламы», – распавяла кіраўнік Цэнтрвыбаркама.

На думку Ярмошынай, гэтак адбываецца, бо выбары ў Беларусі бясплатныя.

«Мяркую, нам даўно трэба пераходзіць да прынцыпу, які выкарыстоўваюць нашы суседзі – Украіна ці Расея. Напрыклад, ва Украіне, каб удзельнічаць у выбарах, трэба ўносіць выбарчы заклад – здаць у грыўнях суму, эквівалентную 93 тысячам долараў. Калі не праходзіш у другі тур, грошы залічваюцца ў бюджэт. Але ў нас краіна небагатых людзей. Нельга рабіць выбары толькі для алігархаў. Таму я прапаную: кандыдат павінен не ўносіць залог, а стварыць мінімальны фінансавы фонд і пакласці туды грошы. Гэта пацвярджае сурʼёзнасць ягоных намераў удзельнічаць у выбарчай кампаніі.

Гэтыя сродкі ён зможа выкарыстаць для аплаты дзейнасці ініцыятыўнай групы, друку рэкламнай прадукцыі. У любым выпадку гэта дазволіць правесці адбор і не дапусціць да выбараў дэкласаваныя элементы», – сказала яна.

Ярмошына таксама прапанавала паменшыць колькасць подпісаў, неабходных для рэгістрацыі, да 1% выбарнікаў (больш за 70 тысяч). Нагадаем, паводле дзейнага заканадаўства, патэнцыйны кандыдат павінен сабраць больш за 100 тысяч подпісаў.

Цэнтрвыбаркам абмежаваў колькасць назіральнікаў на выбарчых участках

КА belsat.eu

Hавiны