«Не апускаемся ў вобласць палітыкі». Ідэолагі «судзілі» актывіста за падтрымку незалежнасці

Моладзевага актывіста Арсенія Дзядка 23 студзеня камісія па справах няпоўнагадовых Савецкага раёну Менску прызнала вінаватым ва ўдзеле ў акцыі супраць інтэграцыі з Расеяй і вынесла яму папярэджанне. Як праходзіць працэдура, дзе «судзяць» за палітыку і адначасова яе баяцца – у рэпартажы Belsat.eu.

17-гадовы Арсеній Дзядок прыйшоў на паседжанне з татам Аляксандрам, які падтрымлівае пазіцыю сына і таму дазволіў журналістам прысутнічаць і фіксаваць усё, што адбываецца. Інтарэсы Арсенія таксама прадстаўляе адвакат Вадзім Мушынскі.

Арсеній Дзядок разам з татам Аляксандрам. Фота: Belsat.eu

23 студзеня камісія разглядала 4 адміністратыўныя пратаколы, складзеныя міліцыянтамі на актывіста: за прамову на сходзе падпісчыкаў блогера NEXTA 8 лістапада на Плошчы Свабоды, за заклік прыходзіць на наступную акцыю 15 лістапада, які нібыта агучыў Арсеній, а таксама за ўдзел у двух вулічных пратэстах супраць паглыблення інтэграцыі з Расеяй – 7 і 8 снежня. Па ўсіх чатырох пратаколах Арсеній сваёй віны не прызнаў.

Назад у часе

На ўваходзе ў памяшканне на праспекце Незалежнасці, дзе месціцца камісія, кідаецца ў вочы дзіўнаватая сацыяльная рэклама. Асабліва прыцягвае ўвагу плакат у абарону правоў дзіцяці, дзе гаворыцца, што ў яго ёсць «права на ўдзел у жыцці грамадства» і на «захаванне пачуцця ўласнай годнасці».

Фота: Belsat.eu

Падаецца, апошні раз інтэр’ер тут абнаўлялі задоўга да нараджэння Арсенія. Працёртыя адкідныя крэселкі ў цёмным і цесным калідоры, на сценах – савецкія барэльефы з лозунгамі пра «сяброўства народаў».

«На вуліцы 2020 год, а заходзіш сюды – і адразу ў пачатку 80-ых!» – усміхаецца хлопец.

Фота: Belsat.eu

«Дзядок!» – даносіцца з прыадчыненай дзверы. За доўгім сталом сядзяць 9 чалавек: метадысты, сацыяльныя педагогі і чыноўнікі з раённага ўпраўлення адукацыі Савецкага раёну. У прэзідыуме – Аксана Ласіцкая, намесніца старшыні камісіі па справах няпоўнагадовых Савецкага раёну і міліцыянт у форме, начальнік інспекцыі па справах няпоўнагадовых Іван Кацэба. Ад гістарычнага факультэту БДУ, дзе Арсеній навучаецца на 1 курсе, прыйшла намесніца дэкана па вучэбнай і выхаваўчай працы Лілія Бярэйшык.

Іван Кацэба. Фота: mvd.gov.by

Недазволены дазволены пікет

На пачатку Дзядок хадайнічаў аб тым, каб весці працэс па-беларуску. Старшыня камісіі запытала, ці ён наагул не разумее расейскай і на якой мове ў такім разе атрымлівае адукацыю.

«У нас на факультэце выкладанне вядзецца і на расейскай, і на беларускай. Дзядок навучаецца на беларускамоўнай плыні, і, паколькі ў нас дзве дзяржаўныя мовы, гэта не ёсць праблемай», – адзначыла Бярэйшык.

Склад камісіі. Фота: Belsat.eu

Пазней старшыні камісіі давядзецца выбачацца за сваю беларускую, бо час ад часу замест «справа» тая кажа «дэла». Здымаць фота, відэа і нават весці аудыёзапіс Ласіцкая забараніла ўсім, акрамя міліцыянта.

Паводле першага пратаколу, Дзядок нібыта парушыў парадак правядзення пікетавання і ўдзельнічаў у акцыі, якая «не мела дачынення да перадвыбарчай агітацыі». Нагадаем, штона акцыю 8 лістапада на Плошчы Свабоды ў Менску прыйшлі прыкладна 200 чалавек – гэта быў сход блогераў, які фармальна праходзіў у межах дазволенага заканадаўствам пікета кандыдаткі ў дэпутаты Палаты прадстаўнікоў ад Партыі БНФ Алены Талстой. З пратаколу вынікае, што Дзядок «выказваў сваё стаўленне да рэзультатаў будучых выбараў» і «выкрыкваў лозунг «Жыве Беларусь!». Адметна, што ў рапартах міліцыянты пішуць гэты лозунг з памылкамі.

«Жыве Беларусь» міліцыянты ў пратаколе напісалі з памылкамі. Фота: Belsat.eu

У якасці рэчавага доказу правапарушэння камісія прадэманстравала відэа, знятае аператыўнікамі падчас акцыі. На ім Дзядок кажа наступнае:

«Я хацеў бы сказаць, што ў час гэтай выбарчай кампаніі і ў бліжэйшыя гады галоўная задача – быць разам, падтрымліваць адзін аднаго і падтрымліваць незалежнасць Беларусі! Жыве Беларусь! Таму я заклікаю ўсіх далучацца да кампаній па падтрымцы незалежнасці Беларусі, памятаць, што мы беларусы, мы нацыя і мы пераможам!»

Жанчыны за сталом перашэптваюцца і скрушна хістаюць галовамі.

Арсеній Дзядок. Фота: Belsat.eu

– Скажыце, калі ласка, а якім чынам афіцыйна дазволены пікет пераўтвараецца ў несанкцыянаванае мерапрыемства? – запытаў тата Арсенія ў камісіі.

– Вы ведаеце, у які адрэзак часу можна праводзіць пікетаванне і вы ведаеце, як падаюцца дакументы на афіцыйны дазвол, – адказвае старшыня. Потым яна звяртаецца да Арсенія:

– Вы мэтанакіравана туды ішлі ці выпадкова заблукалі?

Арсеній звяртае ўвагу, што ў той жа час на Плошчы Свабоды праходзілі пікеты праўладных кандыдатаў ад «Белай Русі», але гэта – «не прадмет разгляду». Праз некалькі хвілін дыскусіі, падчас якой Дзядок з татам даказвалі, што дазвол на пікет падчас перадвыбарчай кампаніі непатрэбны, а, значыць, акцыя была легальная, Ласіцкая пагадзілася адкласці разгляд пратаколу. Да таго моманту камісія збіраецца запрасіць у Менгарвыканкаму дакумент, які пацвердзіць, што пікеты ў тым месцы сапраўды былі дазволеныя.

У Менску пратэсты супраць інтэграцыі з Расеяй. «Белсат» правёў стрым

Алоўкам па рапарце

Аднак на фіксаванні прамовы Дзядка 8 лістапада міліцыянты не спыніліся і склалі яшчэ адзін пратакол паводле ч. 1 арт. 23.34 КаАП – за «публічны заклік» на акцыю 15 лістапада. Цытату Арсенія, якую кваліфікавалі як заклік, старэйшы лейтэнант Андрэй Прыходзька выявіў падчас маніторынгу сайту «Хартыя ‘97».

– А навошта супрацоўнік міліцыі зайшоў на заблакаваны ў Беларусі сайт і пачаў яго маніторыць? – заўважае «падсудны».

Цікава, што рапарт начальству міліцыянт Прыходзька даслаў адразу, але ў верхнім правым кутку дакументу маёр Нікіціна алоўкам пазначыла трыма клічнікамі: «Разбіральніцтва праводзіць пасля выбараў!!!»

У верхнім правым кутку алоўкам напісана: «Разбіральніцтва праводзіць пасля выбараў!!!» Фота: Belsat.eu

І па гэтым пратаколе, і па наступным Дзядок не прызнае віны, а доказаў камісіі, відавочна, бракуе. Разгляд пераносяць на 27 студзеня.

Калі Арсеній спрабуе выказаць сваё меркаванне наконт інтэграцыі, старшыня камісіі перарывае: «Не апускаемся ў вобласць абмеркавання палітыкі!»

NEXTA на плошчы. Стрым з акцыі беларускіх блогераў

«Знішчэнне ўсяго маладога»

Чацверты пратакол датычыў удзелу Дзядка ў акцыі 8 снежня. Больш за ўсё старшыню камісіі абурыла, што акцыю не дазволіў Менгарвыканкам.

– Мяне здзіўляе, як і ўсіх тут, хто мае дзяцей, чаму людзі, якія арганізоўвалі гэта, загадзя не паведамілі вам, што ўсё-такі вы будзеце ўдзельнічаць у мерапрыемстве, якое з’яўляецца несанкцыянаваным і за якое існуе артыкул 23.34 КаАП, – кажа Аксана Ласіцкая.

– Я скажу шчыра: я ведаў гэта і ішоў мэтанакіравана. Калі трэба будзе абараняць Беларусь у тым ліку са зброяй у руках, мне не трэба будзе ні загад ад вас, ні ад кагосьці яшчэ, – парыруе хлопец. Сонныя ідэолагі за сталом паднялі вочы ад тэлефонаў.

«Гэтага саюзу не павінна быць». Два дні запар пратэсты супраць інтэграцыі. ВІДЭА

Пасля непрацяглай нарады за зачыненым дзвярыма камісія прызнала Арсенія Дзядка вінаватым у парушэнні арт. 23.34 КаАП. Зважаючы на станоўчую характарыстыку з універсітэту, яму вынеслі афіцыйнае папярэджанне.

«Справа, відавочна, палітычная. Гэта знішчэнне ўсяго маладога, усяго жывога. Я не ведаю гэтых асобаў у камісіі, але думаю, яны прагаласавалі так, як ім сказалі. Гэта жах», – сказаў па заканчэнні паседжання Аляксандр Дзядок.

«Усё гэта нагадвае сход камсамолу з гісторыі. Сядзяць жанчыны з начосамі і бачна, што ім складана, канец працоўнага дня. Але таксама бачна, што справы вельмі лёгка адпраўляюць на дапрацоўку дый разглядаюць іх не надта ахвотна», – пракаментаваў рашэнне Арсеній Дзядок. Ён дадаў, што ў бліжэйшым часе плануе яго абскардзіць.

Вялікі фотарэпартаж з двух дзён пратэстаў. Шукайце сябе на здымках

 

КА, фота аўтара Belsat.eu

Глядзі таксама