Кампанія «Права выбару», якая аб’ядноўвае восем палітычных партый і грамадзянскіх структур, фіксуе беспрэцэдэнтную колькасць парушэнняў падчас датэрміновага галасавання. Толькі ў першы дзень назіральнікамі было зафіксавана 472 выпадкі парушэнняў.
Амаль палова парушэнняў (49,3 %) – нядопуск акрэдытаваных назіральнікаў у памяшканні для галасавання. Маюцца таксама несупадзенні колькасці зафіксаваных выбарнікаў у пратаколах камісій з колькасцю людзей, якія ўвайшлі на выбарчы ўчастак. Незалежныя назіральнікі зафіксавалі таксама неналежнае захаванне скрыняў для галасавання, ёсць факты змушэння выбарнікаў галасаваць датэрмінова, прыклады перашкодаў праводзіць назіранне, выдаленне назіральнікаў з выбарчых участкаў, адмовы ў акрэдытацыі.
«Гэтыя выбары – беспрэцэдэнтныя паводле маштабу парушэнняў, пра гэта можна казаць ужо зараз, – кажа Ігар Барысаў, кіраўнік партыі БСДП, якая ўваходзіць у склад кампаніі «Права выбару». – Калі мінулым разам за ўвесь перыяд галасавання было зафіксавана 700 выпадкаў парушэнняў, то зараз толькі ў першы дзень – 472. Прычым, гэтыя парушэнні набываюць усё больш грубыя і адкрытыя формы».
Ігар Барысаў прыводзіць прыклады: на шэрагу выбарчых участкаў кабінкі для галасавання адкрытыя, без якіх-небудзь занавесак ці шторак. А гэта парушэнне таямніцы галасавання.
«Такога абсурду не было ніколі. Уражанне, што, калі пры гэтай уладзе будуць праходзіць яшчэ адны выбары, то на выбарчых участках ужо будуць стаяць людзі са зброяй і паказваць у бюлетэні за каго галасаваць. Калі я гэта кажу, то зусім не жартую – гэта прыклад адной з афрыканскіх краінаў, дзе ў кабінках стаяць вайскоўцы са зброяй і сочаць за галасаваннем», – распавядае спадар Барысаў.
Паводле назіральніка, сённяшні рэжым як ніколі разумее, што не мае падтрымкі, што маральна прайграў грамадству. А вакол альтэрнатыўнага кандыдата назіраецца моцная салідарнасць у грамадстве.
«Візуальна складаецца ўражанне, што сёлета выбарчая кампанія пераўзыходзіць нават першыя прэзідэнцкія выбары 1994 года паводле такой масавай падтрымкі апанента Лукашэнкі. Калі 10-20 тысячныя мітынгі адбываюцца ў рэгіёнах, то гэта ўжо пэўны зрэз грамадства. І мітынгі – толькі верхавіна гэтага айсберга», – упэўнены Ігар Барысаў.
У якасці прыклада суразмоўца прыводзіць выступ Аляксандра Лукашэнкі 4 жніўня.
«Гэта ўжо не той дыктатар. І ён разумее, што яму трэба любым коштам утрымаць уладу і датрымаць да таго часу, каб паспрабаваць перадаць яе сваім сынам ці камусьці са свайго блізкага атачэння, каб забяспечыць будучыню сабе і сваёй сям’і. Але гэтая дынаміка, якая распачалася, яна ня скончыцца для ўладаў выбарамі 9 жніўня і падлікам галасоў. Грамадства ўзрушылася, яно будзе дамагацца канчатковай адстаўкі гэтай улады», – кажа Ігар Барысаў.
Чальцы кампаніі «Права выбару» склалі каля 300 скаргаў ва ўчастковыя і раённыя выбарчыя камісіі па выніках першага дня датэрміновага галасавання.
Назіранне за хадою галасавання таксама праводзіць кампанія «Праваабаронцы за свабодныя выбары». Чальцы кампаніі адзначаюць шматлікія факты прымусовага датэрміновага галасавання, пазбаўлення акрэдытацыяў і масавага затрымання незалежных назіральнікаў на выбарчых участках.
«Заўсёды было шмат нараканняў на датэрміновае галасаванне, але гэтым разам гэта абсалютна непразрысты працэс: назіральнікі фактычна пазбаўленыя магчымасці сачыць за хадою выбарчага працэсу. І гэтым разам датэрміновае галасаванне парушае нават усе тыя нормы, якія ўтрымлівае цяперашняе недэмакратычнае і недасканалае выбарчае заканадаўства. Хада цяперашняй кампаніі не адпавядае нацыянальнаму заканадаўству і ўсім міжнародным нормам», – канстатуе прадстаўнік кампаніі «Праваабаронцы за свабодныя выбары» Уладзімір Лабковіч.
Галіна Абакунчык Belsat.eu