«Навошта патрэбны «перапіс беларускамоўных»? Зайдзіце і ўпэўніцеся, што гэтыя людзі класныя!»
За два дні каля тысячы асобаў зрабілі асабістыя білборды «Гэта я – беларускамоўны…».
Пад яе афіцыйнай назвай «Перапіс беларускамоўнага насельніцтва» хаваецца зусім неафіцыйная форма. Пара клікаў – і ў стужцы навін сяброў у сацсетках мільгане, што вы – беларускамоўны. У дадатак карцінка з’явіцца сярод іншых на сайце «Мовы Нанова».
Глядзіце курсы «Мова Нанова» на «Белсаце»!
Анлайн-білборды ствараюць па ўсім свеце беларусы самых розных прафесіяў. Беларускамоўныя інжынер-праграміст Аляксандр Лук’янаў з Ню-Ёрку, студэнтка Алена Крушэўская з Будапешта, перакладчыца Юлія з Барселоны, джазавы піяніст Зміцер з Марока. Не гаворачы пра ўсю геаграфію Беларусі.
– Мы разбураем стэрэатыпы, звязаныя з беларускай мовай, – кажа заснавальнік курсаў і вядоўца заняткаў у Менску Глеб Лабадзенка. – Зайдзіце і ўпэўніцеся, што беларускамоўныя людзі класныя. Дзіву даешся, якія розныя ў іх прафесіі: чыгуначнік, кіроўца грузавога аўто, святар, лекар, праграміст, дызайнер…
Акцыя распачалася ў інтэрнэце – і колькасць наведнікаў сайта моўных курсаў павялічылася ўдвая. Адныя прыходзяць згенераваць карцінку для сябе, другія – для сяброў, трэція – паглядзець на іншых. Калі вырашыце «ўпісацца» самі, не хвалюйцеся, што на сайце ў агульнай галерэі карцінка з’явіцца не адразу. Перад апублікаваннем яна праглядаецца адміністратарам.
– Ёсць карцінкі, якія так і застаюцца неапублікаванымі з-за супярэчлівых подпісаў. Каб не пакрыўдзіць кагосьці, перастрахоўваемся, не публікуем, – удакладняе Глеб Лабадзенка. – Калі гартаю фота, бачу людзей, якіх я ведаю. Тых, што прыйшлі да беларускай мовы дзякуючы курсам. Гэта мяне цешыць. Ёсць і тыя, якіх бачу ўпершыню, і гэта таксама мяне цешыць. Наш перапіс добраахвотны і не значыць, што калі тут будзе тры тысячы чалавек, то ўсяго столькі беларускамоўных. Але калі наш білборд падштурхне кагосьці да вывучэння беларускай мовы, я буду рады.
У каментарах пад карцінкамі ў сацсетках людзі цікавяцца: «А што, калі я размаўляю на некалькіх мовах? Можна ўпісвацца?» Арганізатары заклікаюць дадавацца ўсіх. І нават тых, хто толькі хоча пачаць размаўляць.
Форму для стварэння білбордаў распрацаваў беларускамоўны праграміст Вячаслаў Радзівонаў. Адаптаваў яе для сайта курсаў наведнік менскіх заняткаў праграміст Юрась Адамовіч.
Настасся Маланка, belsat.eu
